A caída de árbores e pólas en vías de circulación (132), actuacións de prevencións de risco (64), obxectos varios nas estradas (37), restos de cables da luz e do teléfono nas calzadas (22), Anegamentos en estradas (15) e inundacións en vivendas (12) foron as incidencias que máis se repetiron.

Na comarca do Baixo Miño en Oia a caída dun poste do tendido eléctrico na zona do cemiterio e a caída de cables de alta tensión sobre a estrada PO-552 foron as incidencias máis destacadas, esta última obrigou ao corte da circulación na estrada que comunica A Guarda e Baiona, ocasionando importantes retencións ao longo de máis dunha hora, desprazándose ata o lugar axentes da Guardia Civil de Tráfico e da compañía eléctrica.

Na Guarda a incidencia máis importante foi o derrube de 3 das carpas instaladas na Praza Avelino Vicente e que formaban parte do Mercado de Nadal do Municipio, obrigando a desprazarse á Policía Local e ao GES da Guarda que procederon a acordoar a zona para evitar máis danos materiais.

No resto da comarca, caídas de polas de árbores, pequenos deslizamentos de terra e balsas de auga sobre as estradas foron algunhas das incidencias máis salientables nesta xornada de meteoroloxía adversa con Alerta Laranxa por costeiros e vento e Alerta Amarela por choivas.

A situación no mar continúa a ser perigosa, con forte ondaxe que impedíu aos mariñeiros saír a faenar coa frota amarrada en Porto.

Os ventos fortes predominaron ao longo desta xornada, froito disto foi o dato recollido na estación meteorolóxica de Castro Vicaludo en Oia, cunha racha máxima de vento que chegou aos 152.3  km/h e choivas acumuladas de 28l/m2.

Pola súa banda a estación meteorolóxica de Areas en Tui rexistrou 24.8  L/m2 de choiva acumulada e unha racha máxima de vento de 49.4  km/h, no caso da estación meteorolóxica de As Eiras no Rosal, rexistráronse choivas acumuladas de 25.4  L/m2 e racha máxima de vento de 71.7  km/h.

GALERÍA DE FOTOS

Haz clic en la imagen de abajo para acceder a la Galería de fotografías