Dende o comezo, creouse un equipo de radio formado por docentes de Primaria e Secundaria do CPI, e nomeouse unha coordinadora, membro do Departamento de Orientación, con formación específica en Pedagoxía.

Creouse no centro unha ferramenta non só de comunicación, senón sobre todo de corte pedagóxica, coa intención de integrala no currículo, e na normalidade das aulas. Con frecuencia semanal, graváronse programas en todos os niveis educativos do centro, realizáronse entrevistas a persoeiros que visitaron o colexio, e utilizouse a radio para facer partícipe dela aos membros dos clubes de lectura, do grupo de teatro, de voluntarios de bibliotecas, para difundir o Plan Proxecta, etc.

Recibiuse formación, docentes e alumnado, por parte de expertos enviados pola Asesoría. E mesmo establecimos un contacto con outro centro educativo con longa experiencia en radio escolar, o IES O PERDOURO, de Burela -creadores do Proxecto NEO- cos que chegamos a realizar un programa en directo, artellando a maneira técnica de facer intervir a diferentes rapaces e rapazas do noso centro, e escoitando, simultanemante, o programa en todas as clases da ESO. Con eles realizaremos un intercambio na última semana lectiva deste ano académico.

Chega a fin de curso, e con ela a necesidade de abrila oficialmente. Tras convocarse un concurso de ideas para crearlle un nome e unha imaxe, acabou chamándose A VOZ DA MATA, en honor ao nome co que familiarmente se coñece o colexio na vila.

O mércores 13 de xuño realizouse a presentación oficial contado coa visita da xornalista e escritora MARÍA SOLAR, quen foi entrevistada polo alumnado que leu algúns dos seus libros, na propia radio.

Neste acto interviron César Pérez Ares, Xefe Territorial de Educación, Carlos Alberto Antuña Souto, Inspector de Edcuación, Paz Fernández Pereiro , Asesoría de Bibliotecas Escolares, Mª del Carmen Alonso Alonso, Alcaldesa de O Rosal, Mila Pérez Enríquez, presidenta da ANPA do CPI Manuel Suárez Marquier e Isaac González González da Comunidades de Montes de O Rosal.

Despois dun sinxelo acto cargado de moita ilusión e algunha pincelada musical, subíuse á ubicación da radio, para inaugurala oficialmente.

Dende o centro manifestaron que "Comezamos esta andadura como consideramos que era urxente: converténdoa nunha ferramenta de expresión dos nosos alumnos e alumnas, de integración, que sirva de vehículo das diferentes materias, e que nos conecte co exterior. En breve melloraremos o espazo, coa creación dunha cabina insonorizada, e un mellor acondicionamento.

Mentres tanto, segue a ser un valor fundamental no noso centro, que nos comunica coas familias e a contorna, e que dá voz aos verdadeiros protagonistas do noso centro, o alumnado."

GALERÍA DE FOTOS

Haz clic en la imagen de abajo para acceder a la Galería de fotografías