ESPECIAL - TOMIÑO E VILA NOVA DE CERVEIRA ACOLLEN A CELEBRACIÓN DOS XXVII XOGOS GALAICO DURIENSES

Os concellos fronteirizos de Tomiño e Vilanova de Cerveira, acollen dende onte a celebración dos XXVII Xogos Galaico-Durienses.

Este evento deportivo universitario, que porá en competición a 200 deportistas seleccionados (estudantes, docentes e outro persoal) pertencentes ás seis universidades públicas da Eurorrexión: Santiago de Compostela, A Coruña, Vigo, Trás-os-Montes e Alto Douro, Minho e Porto, foi inaugurado este mediodía no Auditorio de Goián.

O acto contou coa presenza da alcaldesa de Tomiño, Sandra González, quen deu a benvida a todos os participantes, salientando a valor da convivencia co país veciño, e desexándolles unha estadía proveitosa.

Juan Lirón, director AECT Galicia-Norte de Portugal, explicou que o obxectivo destas xornadas é a cooperación transfronteiriza, nunha áreas estratéxica coma o deporte.

O director da Fundación CEER, Rubén Lois, pola súa banda, subliñou que un dos fins da entidade que preside, e que engloba ás seis universidades participantes, é organizar eventos que vinculen a persoas e organismos dun e outro lado da fronteira. Salientou neste sentido, a importancia de recuperar nesta XXVII edición, a participación dos seis centros educativos superiores de Galicia e Norte de Portugal.

O acto contou tamén con representantes da Cámara Municipal de Vilanova de Cerveira e das universidades participantes nos xogos, así coma coa presenza dos responsables das áreas de Deportes de cada localidade.

Organización
Cada unha das delegacións universitarias estarán formadas por 33 deportistas e técnicos, que competirán nas modalidades de baloncesto, fútbol sala e xadrez.
A XXVII edición dos Xogos Galaico-Durienses está organizada pola Fundación Centro de Estudios Eurorrexionais Galicia-Norte de Portugal (CEER) en colaboración coa Agrupación Europea de Cooperación Territorial (AECT), ambas entidades dedicadas á cooperación transfronteriza Galicia-Norte de Portugal, xunto con seis universidades públicas de Galicia e do Norte de Portugal (universidades de Santiago de Compostela, Trás-os-Montes e Alto Douro, Vigo, Minho, Porto e A Coruña), o Concello de Tomiño e a Cámara Municipal de Vilanova de Cerveira. Tamén o grupo galego Gadisa, decidiu apoiar este vento co seu patrocinio.

Programa
Os XXVII Xogos Galaico Durienses iniciáronse onte, ás dez da mañá, co Seminario de Deporte Universitario "O deporte universitario na Eurorrexión Galicia-Norte de Portugal. Liñas estratéxicas, orientacións e principais desafíos entorno a Estratexia Europa 2020", celebrado no propio auditorio. No seminario participaron representantes dos servizos e titulacións deportivas das seis universidades públicas da Eurorrexión, xunto cos representantes de deporte das corporacións municipais de Tomiño e Vilanova de Cerveira. Un encontro que foi moderado polo profesor Manuel Janeira, Pró-Reitor de Cultura, Desporto e Lazer da Universidade do Porto.

Á unha da tarde, hora española, celebrouse o acto de inauguración, para dar paso, a partir das catro da tarde, ao inicio da competición deportiva na modalidade de fútbol sala, no Poliderpotivo de Goián. Á mesma hora dará comezo no Polideportivo de Vilanova de Cerveira, a competición na modalidade de baloncesto.

As competicións do día 19 prolongáronse até as dez da noite (hora española), continuando o día 20, até as dúas da tarde (hora española), momento no que está prevista nas instalacións do Pavillón Municipal de Vilanova de Cerveira, a entrega de trofeos aos gañadores das disintas modalidades deportivas.

No mesmo pavillón, posterior á entrega de trofeos, celebrarase a Cerimonia de Clausura desta edición dos Xogos Galaico Durienses; acto ao que asistirán o Secretario de Estado do Desporto e Juventude de Portugal, o Secretario Xeral de Deportes da Xunta de Galicia, o Presidente da Fundación CEER e Reitor da Universidade do Minho, a alcaldesa de Tomiño, o presidente da Cámara Municipal de Vilanova de Cerveira, e representantes institucionais das seis universidades participantes.

Fotos de Jorge Alonso Daldea