GALICIA CONTA CUN 4% MÁIS DE FONDOS FEADER NO PERÍODO 2014-2020 QUE NO INICIO DO PROGRAMA ANTERIOR (2007-2013)

Rosa Quintana sinalou que neste caso negociouse ben no contexto estatal, xa que no gasto FEADER por habitante Galicia é a quinta comunidade autónoma que máis fondos recibe, con 323,9 euros por habitante, e supera nun 86% a media de España, situada en 173,7 euros/habitante.

A titular do Medio Rural e do Mar insistiu tamén en que na nosa Comunidade houbo un amplo proceso participativo para impulsar este programa, con múltiples xuntanzas con axentes do rural e dúas específicas con todos os interesados, celebradas os días 2 e 18 de xullo de 2014, ás que cómpre engadir a de lanzamento da consulta xa o 7 de novembro de 2013.

Como proba de que o proceso de participación funcionou, a conselleira lembrou que houbo alegacións de 9 axentes do rural, das que se recolleron boa parte das propostas, para un programa que –matizou– non é un instrumento de planificación das políticas para o rural, senón un complemento dos demais instrumentos da PAC e das liñas que tamén establece o Goberno da Xunta e o do Estado.

Por outra banda, Rosa Quintana subliñou que “non diminuímos o apoio á liña de incorporación de mozos á actividade agraria, xa que a cantidade de FEADER que destinamos medra de 46,3 millóns de euros a 50,1 millóns, o que supón un incremento do 8,2% con respecto ao período anterior”. Engadiu que se potenciarán as axudas xa existentes para a reforma de vivenda habitual ou compra de gando, con certas novidades como poden ser o incremento do importe da prima de incorporación respecto ao anterior período. Tamén se realizarán pagos en dous prazos desde que se instale o mozo para dotarlle de liquidez dende o primeiro momento, ou que se considerarán novos gastos elixibles como os pagos da cotización da Seguridade Social.

A conselleira desbotou, por outra parte, introducir neste PDR un subprograma temático para a montaña, xa que isto está pensado para cando non se contemplan medidas para atender estas necesidades, o cal non é o caso de Galicia, que para as zonas de montaña asigna un amplo número de medidas e cunha dotación importante, explicou.

Rosa Quintana sinalou ademais que se mantén o apoio á transferencia de coñecementos e actividades de formación e o investimento de FEADER nesta medida é de 8,5 millóns de euros, fronte aos 8,4 millóns do anterior período.