GALIZA REXISTRA UN NOVO AUMENTO DO PARO E UNHA BAIXADA DO NÚMERO DE PERSOAS ACTIVAS E OCUPADAS

No primeiro trimestre de 2016 subiu o paro en Galiza en 5200 persoas, un 2,31% máis con respecto ao período anterior, malia caer a poboación activa e a poboación ocupada. Trátase dun incremento nove veces superior ao rexistrado no conxunto do Estado, onde a subida foi do 0,25%. Para a CIG, estes constatan a gravidade da situación laboral do noso país, evidencian o fracaso das políticas económicas do PP e contrastan coas mensaxes propagandísticas e electoralistas da Xunta e do Goberno español.

Os datos da Enquisa de Poboación Activa do Primeiro Trimestre de 2016  constátase un incremento do número de persoas desempregadas, respecto do trimestre anterior, en 5200 (un 2,31% máis), o que sitúa a taxa de paro no 18,2%, cinco décimas máis. Deste xeito, o número total de galegos/as en situación de desemprego acada os 227.900. Isto supón que a taxa de paro medrou no noso país até nove veces máis que no conxunto do Estado, onde a subida foi do 0,25%.

Para a CIG é especialmente alarmante que se produza este incremento cando, parello a isto, cae o número de persoas activas en 6.200, situándose a taxa de actividade no 53,1%, e cae tamén o número de persoas ocupadas en 11.400, acadando unha taxa de ocupación do 43,5%.

A situación é tanto máis grave se a comparamos co mesmo trimestre do ano 2009, ao comezo da crise. Datos que poñen de relevo o deterioro que sufriu o mercado laboral. A poboación galega de 16 anos ou máis era daquela de 2.387.500 persoas; hoxe é de 2.351.100 persoas (82.100 menos). Había un total de 1.331.100 persoas activas, cando hoxe son 1.249.000, co que se reduciu en exactamente o mesmo número de persoas en idade de traballar (-82.100).

Porén, reduciuse en moita maior medida o número de persoas ocupadas, que en 2009 era de 1.168. 500, cando hoxe son 1.021.100, unha caída de nin máis nin menos que 147.400 persoas ocupadas. E o número de persoas desempregadas, que daquela eran de 162.700 é hoxe de 65.200 máis.

A este desolador panorama hai que lle engadir que respecto do último trimestre de 2015, o número de fogares no que todos os seus membros activos están no paro incrementouse en 5.100, situándose nun total de 80.200.

Onde máis cae a ocupación é no sector Servizos, en 9.200 persoas; na construción cae en 1.900 e en Industria en 1.400. A taxa de paro xuvenil é do 31,4% (diminúe tanto respecto do último trimestre como do mesmo trimestre do ano anterior); a súa taxa de actividade sobre un 0,4%, situándose no 51,8% e a taxa de ocupación sobe un 0,6% situándose no 35,5%. No primeiro trimestre hai en Galiza 797.600 persoas asalariadas, 14.700 menos que no trimestre anterior.

Ademais, o ritmo de crecemento dos contratos temporais foi dúas veces e media superior ao dos contratos indefinidos. Deste xeito, o peso de número de persoas con contrato temporal, respecto do mesmo trimestre do ano pasado, pasou do 23,5% ao 25%. E no caso dos mozos e mozas de entre 16 e 29 anos situouse neste primeiro trimestre no 59,8%.

Grandes concellos

Poboación de 16 e máis anos dos sete grandes concellos de Galiza por sexo e relación coa actividade económica. Ano 2016/I

Taxas de actividade, ocupación e paro para a poboación de 16 e máis anos dos sete grandes concellos de Galiza. Ano 2016/I