Grandes oportunidades e novos retos do sector turístico de Pontevedra

Deste xeito, o plan de concertación sinalou, nun primeiro lugar, que os e as participantes consideran que o desenvolvemento turístico da provincia se sitúa nun nivel medio, cunha puntuación de preto do 6 sobre 10 entre as entidades privadas e de preto do 6,5 entre os concellos, considerando o 56% delas e deles que o destino é altamente competitivo.

Na valoración dos aspectos xerais do destino, neste caso cunha puntuación sobre 5, os que mellor valoración acadaron foron a gastronomía (4,7), a paisaxe (4,7) e os espazos naturais (4,5). Seguíronlle os monumentos, a hospitalidade (4,1 para as dúas), o clima (4) e a animación e vida do destino (3,5). Nos relativos ao ámbito público, foron a atención (3,2), o estado das infraestruturas (3,1) maila conservación do patrimonio cultural e natural (3,1) os que acadaron unha mellor valoración, seguidos dos servizos públicos e urbanismo (3), dos horarios de atención (3), os accesos (2,9), a información turística (2,8), a accesibilidade universal aos recursos (2,7), os paneis informativos (2,6) e a sinalización (2,6). Nos que corresponden ao ámbito privado foron as ofertas de restauración (3,8) e de aloxamento (3,6) maila relación calidade-prezo (3,6) as gañadoras. Por debaixo, a infraestruturas e equipamento dos establecementos (3,3), os horarios de atención (3,1), a oferta de actividades complementarias (2,9) e a innovación do sector (2,8).

O plan de concertación do Plan Estratéxico de Turismo 2017-2020 identificou os produtos prioritarios do destino Rías Baixas nos seguintes: turismo enogastronómico, turismo de sol e praia, festas de interese turístico e grandes acontecementos, Camiño de Santiago, turismo activo e de aventura, turismo cultural, turismo de natureza, turismo rural e turismo termal.

No que se corresponde coas accións de promoción, as liñas escollidas prioritariamente polos concellos e as entidades participantes foron a promoción a través das redes sociais (14,8%) e da páxina web do destino Rías Baixas www.turismoriasbaixas.com (11%), os acordos coas empresas tour-operadoras (14,6%) así como a elaboración de apps turísticas (9%) ou os fam trips e blog trips (8%) e a elaboración de presentacións en mercados emisores (outro 8%). Por debaixo, as propostas destacadas foron os acordos coas OTAS (7,9%), as campañas publicitarias en medios convencionais (7,8%), o marketing online (7,4%), a asistencia a feiras turísticas (6,8%) e o marketing directo (4,2%).

Ademais, nas mesas de traballo, enquisas e entrevistas tamén se sinalaron os principais mercados nos que levar a cabo estas accións promocionais: Madrid (16%), a propia Galicia (12%) e o País Vasco (12%), no mercado estatal, seguidos de Cataluña (9,3%), Castela León (8,9%) e Andalucía (7,9%). O Reino Unido (16%), a Alemaña (15%), Francia (14%) e Portugal (13,7%) foron os mercados internacionais sinalados como principais, seguidos polos países nórdicos (10,1%), Países Baixos e Bélxica (9%) e os Estados Unidos (7,6%) mailo mercado asiático (6,4%).

O plan de concertación tamén avaliou as materias principais nas que se debe focalizar a formación e profesionalización do sector turístico e, malia que todas as materias se consideraron prioritarias de maneira unánime (cunha puntuación de máis de 4 puntos sobre 5), as que acadaron unha maior valoración de necesidade foron os idiomas (4,6), a atención ao cliente e a innovación turística (4,4 en ambos os dous casos), seguidos pola calidade turística e a sustentabilidade (cun 4,3 cada unha). Por detrás, o produto turístico (4,3), uso das TIC (4,2), marketing, accesibilidade e comercialización turísticos (4,2 todas elas) e, por último, a xestión dos negocios turísticos (4,1).

En canto aos grandes retos identificados, os concellos e o sector privado concluíron resumilos en cinco grandes: en primeiro lugar, a colaboración e coordinación entre as diferentes administracións e o sector privado implicados no turismo do territorio. En segundo lugar, a desestacionalización mediante o impulso de novas iniciativas enfocadas á creación de produto. A ela séguenlle a diversificación da oferta turística e a profesionalización do sector privado para a mellora da competitividade do destino e, en último lugar, a promoción e difusión da provincia cun fincapé na promoción do interior da provincia de Pontevedra.

Deste xeito, as reflexións finais dos resultados da fase de concertación sinalan que o sector turístico da provincia de Pontevedra quere un destino Rías Baixas de calidade e non masificado, cun modelo turístico sostible e unha oferta turística diversificada, que sexa auténtico e diferenciado, desestacionalizado, coordinado e con proxección internacional.

Trala presentación das conclusións en Pontevedra e en Vigo, a Deputación de Pontevedra volverá colaborar cos concellos e o sector privado da provincia para volver analizar estas conclusións antes do inicio da redacción do documento final, un Plan Estratéxico de Turismo para a provincia de Pontevedra que se elabora por primeira vez para o destino Rías Baixas, sendo ademais a primeira vez que na provincia de Pontevedra se reúne aos concellos e ao sector privado para falar da situación actual e do futuro da provincia de maneira conxunta.

O plan de concertación concretouse en 10 mesas de traballo divididas en 8 temáticas (litoral e cultural, das que se celebraron dúas, cruceiros, MICE e turismo urbano, enogastronomía, natureza e termalismo, o Camiño de Santiago, turismo deportivo, activo e de aventura e turismo rural e de raíces), que contaron cunha participación media de 15 persoas. Ademais, 70 entrevistas cos 11 concellos turísticos da provincia de Pontevedra, 7 entidades xestoras, 11 asociacións e 41 empresas clave do sector e, por último, enquisas online para 61 concellos (dos que responderon 54) e 140 empresas, das cales a maior parte procedían de Sanxenxo (un 16%), Pontevedra (un 13%) e Vigo (o 9%).

A Presidenta da Deputación de Pontevedra, Carmela Silva, sinalou onte na presentación das conclusións no Salón de Plenos do Pazo provincial que o Plan Estratéxico estará listo no mes de decembro e que, unha vez rematado, o Goberno provincial quere presentar o documento ante as distintas administracións (Xunta de Galicia e Goberno estatal) para poder contar coas distintas ferramentas de promoción das que dispoñen, así como expresou o desexo de que os concellos da provincia de Pontevedra sexan, nas súas palabras, "axentes protagonistas do desenvolvemento do Plan".