MÁIS DA METADE DOS CONCELLOS DA PROVINCIA ESTARÁN PRESENTES NO CULTURGAL DA MAN DA DEPUTACIÓN

Máis da metade dos concellos da provincia de Pontevedra participarán no Culturgal 2015 a través do espazo que a Deputación de Pontevedra puxo ao seu dispor nesta Feira. Un total de 33 concellos responderon á proposta que se lles trasladou o pasado mes de setembro desde o ente provincial para amosar a súa oferta cultural neste evento, e destes, un total de 12 participarán ademais presentando actividades e propostas culturais no programa da Feira.

O programa do Culturgal 2015, que se celebrará entre os días 4 e 6 de decembro, foi presentado oficialmente esta semana e entre as principais novidades, o presidente de Culturgal, Manuel Bragado, destacou a participación dos concellos da provincia por primeira vez grazas ao espazo da Deputación, indicando a importancia de "achegar ao público tamén a cultura local, alimentando a idea da relación entre cultura e turismo". Na mesma presentación o deputado provincial de Cultura, Xosé Leal fixo fincapé en que " apostamos por contar cun espazo no que amosaremos a cultura que se fai desde os concellos, difundindo a súa programación cultural, nunha experiencia que esperamos manter en anos vindeiros." Leal fixo fincapé no apoio do ente provincial á Feira das Industrias Culturais e fundamentou a colaboración da presente edición na premisa de que "a cultura ten que ser unha industria potente, que debe vertebrar non só a provincia de Pontevedra senón a todo o país".

O espazo da Deputación de Pontevedra contará con varios apartados diferenciados para amosar de xeitos distintos a información dos concellos. Habilitarase un apartado no que se mostrará a información impresa, dípticos, guías, catálogos e libros; un espazo audiovisual composto por varias pantallas para poder visualizar pezas audiovisuais sobre propostas culturais e fitos representativos de cada concello, e un terceiro espazo dedicado integramente a cartelería de eventos e citas representativas.

Representación de todas as comarcas
Da comarca de Pontevedra participarán os concellos de Barro, Campo Lameiro, A Lama, Vilaboa e Poio. Da de Vigo estarán presentes Salceda de Caselas, Baiona e Gondomar. Da comarca do Salnés estarán Vilanova de Arousa, Cambados, O Grove e Sanxenxo. Da comarca de Caldas participarán Valga, Catoira, Caldas, Cuntis e Portas. Desde o Deza e Tabeirós estarán Rodeiro, Lalín, Silleda e A Estrada. Do Condado- Paradanta participarán Salvaterra de Miño, As Neves, Ponteareas, Crecente e Covelo. Desde o Baixo Miño estarán Oia, Tui, Tomiño e A Guarda. E desde a comarca do Morrazo estarán Cangas, Moaña e Bueu.
Comarca Baixo Miño. O Concello de A Guarda participará no posto da Deputación con información sobre a programación cultural anual do concello e con material sobre o Castelo de Santa Cruz. Tamén porá a disposición do público catálogos das exposicións de Antonio Fernández, Alicia Alonso, Xavier Pousa, Xoán Piñeiro e Jorge Barbi, así como discografía de agrupacións culturais representativas de A Guarda.

Desde Oia farán chegar a súa oferta en paisaxe, arqueoloxía e natureza recollidas nunha serie de rutas baixo a denominación 'Oia Ruta Máxica'. Participarán ademais no programa de actividades da Feira coa presentación do proxecto 'Costa dos Castros' o dominto 6 ás 11:30 horas no programa Foro. A presentación correrá a cargo de Xosé Gago, coordinador do proxecto que une a varios entes do concello para poñer en común distintas iniciativas e promover conxuntamente a dinamización turística da zona.

Pola súa banda, Tomiño acudirá con material de asociacións culturais destacadas do concello e Tui amosará a súa axenda cultural e información de carácter turístico.

 

Ver programación Culturgal