Melloras na estrada PO-353 no tramo entre Pancenteo e Marzán no Rosal

Na visita, o delegado estivo acompañado do alcalde da localidade, Jesús María Fernández, así como do xefe territorial de Infraestruturas en Pontevedra, José Luis Díez.

Os traballos teñen como obxectivo, segundo explicou Cores Tourís, "a mellora da seguridade viaria desta estrada ao longo de máis de 2,2 quilómetros mediante a ampliación da súa plataforma, a mellora do firme, a incorporación de beirarrúas e sendas peonís e o acondicionamento da drenaxe e a sinalización existente". Tamén se mellorará, deste xeito, a súa accesibilidade, tanto dos vehículos como dos peóns.

As obras, que darán continuidade ás executadas na Guarda e que teñen un prazo de execución de 6 meses, contemplan unha actuación na sección da estrada, a renovación e ampliación das beirarrúas, a incorporación dunha senda peonil, a substitución da drenaxe lonxitudinal, e a ampliación das drenaxes transversais, reforzó de firme e renovación da sinalización, balizamento e defensas ao longo do treito obxecto do proxecto.

Deste xeito, aumentarase a plataforma existente ata os 7,5 metros de ancho, axustándose en planta e alzado á estrada actual. Tamén se realizará un reforzo do firme mediante estendido dunha capa de regulación de 5 centímetros de espesor e unha capa de rodaxe de 3 centímetros.

Para a execución destas obras, que teñen un orzamento de 900.000 euros, expropiáronse un total de 139 fincas, o que supuxo un coste a maiores de 311.558 euros, elevándose así o custo total da obra ata os 1,2 millóns de euros.

Con estas accións aumentarase a comodidade da circulación ao ampliar o raio das curvas e se incrementará a seguridade e facilitarán os xiros en condicións máis seguras, reordenando as interseccións existentes no tramo.