O 8M marca un mes de reflexión e acción pola igualdade en Tomiño

O mes de marzo chega cargado de actividade a Tomiño cunha programación especial arredor do 8M, Día Internacional da Muller. O Concello presenta un amplo abano de iniciativas que combinan memoria, recoñecemento e acción para seguir avanzando cara a unha sociedade máis xusta e igualitaria.

Baixo o lema de construír igualdade desde a acción e a educación, a programación arrinca co ciclo “Mulleres Referentes” no Espazo Isaura Gómez. O primeiro acto celebrarase o venres 6 de marzo ás 20.00 horas cun coloquio dedicado a Isaura Gómez, símbolo de loita e compromiso social. A xornada incluirá tamén a inauguración dunha exposición sobre mulleres represaliadas durante o franquismo, cedida pola Comisión pola Recuperación da Memoria Histórica do Baixo Miño.

No ámbito científico, o 18 de marzo ás 20.00 horas renderase homenaxe a Aída Fernández Díaz, recoñecida como científica galega do ano pola Real Academia Galega de Ciencias, destacando o papel das mulleres na investigación e no coñecemento. A dimensión política terá o seu espazo o 27 de marzo ás 20.00 horas cunha mesa redonda protagonizada por mulleres referentes neste eido.

O programa complétase co ciclo “Construíndo igualdade”, que inclúe propostas para todas as idades. Entre elas destaca o obradoiro “Historias de tea”, que ao longo de todo o mes promoverá a visibilización da muller na arte mediante a creación dunha obra colectiva.

Para o público infantil, o 7 de marzo ás 12.00 horas celebrarase o contacontos “Vamos ao recreo” no Espazo Isaura Gómez, unha actividade interactiva que fomenta a igualdade desde a infancia. No eido da saúde e do benestar desenvolveranse talleres como “Saúde e benestar dixital”, do 9 ao 20 de marzo, e o obradoiro “Muller e benestar: coidados, saúde e igualdade”.

O ámbito educativo terá un papel destacado con sesións específicas nos centros escolares do municipio. “Os nosos corpos, as nosas normas” dirixirase ao alumnado de 6º de primaria e 1º da ESO para traballar a autoestima, mentres que “Así, si” estará orientado a 2º da ESO, promovendo a comunicación asertiva e relacións afectivas saudables.

Con esta programación, Tomiño reafirma o seu compromiso coa igualdade real e efectiva, apostando pola memoria, a participación cidadá e a educación como piares fundamentais para avanzar cara a unha sociedade máis equitativa.