O Baixo Miño recibíu nos últimos 4 anos preto de 7,2 millóns de euros para obras e servizos

O delegado territorial da Xunta en Pontevedra, José Manuel Cores Tourís, informou esta mañá que a comarca do Baixo Miño recibe ao ano preto de 1,8 millóns de euros do Fondo de Cooperación Local (FCL) para obras e servizos da súa competencia.  Unha cantidade á que hai que sumar outras liñas de axuda e subvencións das distintas consellerías, así como a dotación correspondente ao Fondo de Compensación Ambiental.

Así, os municipios da Guarda, Oia, O Rosal, Tomiño e Tui recibiron nos últimos catro anos 7,2 millóns de euros procedentes do FCL, que se abona en 12 mensualidades e a mes vencido. En canto a fórmula de distribución, o reparto faise en base a criterios obxectivos pactados previamente coa Federación Galega de Municipios e Provincias (Fegamp).

Concretamente, atendendo á fondo base os concellos do Baixo Miño recibiron no último ano:

 

Concello	TOTAL
A Guarda	331.447,19
Oia	186.275,12
O Rosal	282.750,43
Tomiño	475.717,35
Tui	512.639,35

A Xunta de Galicia distribúe ao ano entre os concellos pontevedreses máis de 30,5 millóns de euros, unha dotación orzamentaria que se mantivo intacta durante os anos de recesión, nos que as contas autonómicas minguaron considerablemente.  

Asemade, nos orzamentos do 2019 a Xunta aumenta a dotación deste programa ata os 128,7 millóns de euros, 3,1 millóns máis que no pasado exercicio.  

De feito, tal e como explicou Cores Tourís, no 2019 se culminará o proceso iniciado neste exercicio a través do que a Xunta compensa a aqueles concellos que teñen gastos derivados do mantemento do centros de saúde. Ademais, créase un fondo de emerxencias dotado con 1,9 millóns de euros.

Por outro lado, nos Orzamentos da Xunta para 2019 tamén se ampliará o fondo especial para o fomento das fusións voluntarias entre os concellos galegos, cunha partida de 1,8 millóns de euros, un 38% máis que este ano (1,3%). Dito fondo, creado no exercicio de 2016, enmárcase na aposta da Xunta por beneficiar aos concellos que aposten por sumar esforzos e fusionarse, e vai na liña doutras medidas postas en marcha polo Goberno galego para fomentar a cooperación entre municipios.

Tamén se respalda a aposta do municipalismo galego de colaborar na limpeza de franxas forestais como medida de prevención dos incendios forestais cunha dotación anual de 10 millóns de euros, dos que a Xunta aporta as tres cuartas partes -7,5 millóns-. Outra medida é a implantación dunha vía de colaboración para contribuír a financiar o custe dos conservatorios que neste momento sosteñen os concellos con 500.000 euros.

Finalmente, mantense a partida de 145.000 euros para os municipios que contan con centros penitenciarios; así como a contía destinada a colaborar coas FEGAMP nos gastos xerais.