O CONCELLO DE TOMIÑO DESTIÑARÁ A SANEAMENTO, PROXECTOS EDUCATIVOS E CONTRATACIÓN A MAIOR PARTE DOS FONDOS DO PLAN LOCAL DA DEPUTACIÓN

Silva mostrou a súa satisfacción porque o goberno local de Sandra González xa decidiu a que destinará o diñeiro e que proxectos vai desenvolver. "Desde que chegamos ao goberno da Deputación tivemos moi claro que os Concellos son os protagonistas e os que deben tomar as decisións sobre cales son as prioridades dos seus cidadáns", dixo a Presidenta da Deputación. Neste sentido, a alcaldesa de Tomiño sinalou que gran parte do diñeiro dedicarase a proxectos de saneamento no municipio. "É unha das grandes demandas dos veciños e veciñas, aínda que tamén destinaremos parte dese financiamento a proxectos educativos e a contratación". De feito, González anunciou que cubrirán as 27 prazas do plan de emprego que corresponden ao concello do Baixo Miño, un plan de emprego que tal e como as dúas políticas lembraron, ampliou o número de horas, subiu os salarios e modificouse para adecuarse ás necesidades de organización do traballo nos concellos.

Ou encontro, no que tamén participaron os deputados David Regades e Uxío Benítez, que é concelleiro en Tomiño, discorreu nun ambiente de máxima cordialidade no que a alcaldesa dixo sentirse "dobremente orgullosa da visita porque o feito de que a Presidenta sexa unha muller non é baladí. É algo moi importante para aquelas que traballamos moito para o feminismo e a defensa política de xénero"

Carmela Silva tamén insistiu en que a colaboración cos municipios non queda unicamente no Fondo Local. "Os concellos deben de ser protagonistas en todos os temas. Estamos a traballar nun Plan de Actuación turística en toda a provincia que se fará e pactarase cos gobernos locais. O mesmo vai ocorrer cos fondos europeos nos que os proxectos deben nacer dos concellos"

A Presidenta puxo como exemplo o proxecto de Unimiño que o deputado Uxío Benítez anunciou que proximamente presentará a candidatura de municipios portugueses e da provincia de Pontevedra coa que se pretende poñer en valor o río Miño como recurso económico e turístico da zona.