O DOG publica o decreto de ampliación do Ben de Interese Cultural dos Muíños do Folón e do Picón, no Rosal

Este novo decreto recolle todos os muíños deste ámbito que teñen unha disposición, funcionalidade, tipoloxía e materiais análogos, e inclúe outra serie de elementos patrimoniais destacados como a ermida de San Martiño, no estremo noroeste, ou o castro do Picón, no estremo sueste.

O Decreto 27/1998, do 22 de xaneiro, que declaraba ben de interese cultural, con categoría de lugar de interese etnográfico, os muíños do Folón e do Picón non recollía a totalidade de muíños deste ámbito, senón só os 36 asociados ao río Folón. A ampliación da delimitación do BIC suma o grupo de 31 bens vencellados ao río Picón, até un total de 67 muíños incluídos no BIC. A aprobación deste decreto permite así corrixir unha disfunción da declaración orixinaria, garantindo o mesmo nivel de protección para a totalidade de muíños.

Cómpre subliñar que a formación en serie dos repetidos muíños, dispostos en diferentes ringleiras, posúe un valor estético sobranceiro e resulta unha boa mostra de como unha instalación para aproveitar e explotar os recursos naturais pode reunir en si beleza e utilidade, ademais dun enorme potencial identitario relacionado coa historia da moenda, na cal participa toda a comunidade.

Límites da ampliación
O lugar de valor etnolóxico distribúese polas abas dos montes do Campo do Couto ao oeste e os montes da Valga ou San Martiño ao norte, nos que se localizan todos os seus elementos, incluídos os camiños e as pesqueiras e levadas que conforman o sistema hidráulico. A devandita ampliación ten como obxectivo incluír na delimitación a totalidade de elementos constitutivos deste sistema patrimonial.

Polo norte, o ben estará limitado polo propio límite do termo municipal, enmarcado polos cumios dos altos de Picouto, Carrolo e Castelo, dos cales proveñen as augas principalmente polo rego do Cal ata A Enxubrigada. Polo leste, a marca dáa o propio rego do Cal até O Picón. Mentres que polo sur estaría delimitado polo lugar de Ponte das Penas e Martín e polo oeste polo Campo do Couto.

Dado que no decreto se delimitan todos os espazos necesarios tanto para a conservación da súa integridade, non se estima preciso ningún contorno de protección nin o establecemento dunha zona de amortecemento específica.

Réxime de intervencións e aplicación
Os muíños contan cun nivel de protección integral, malia que se entende que nas futuras actuacións e procesos de consolidación, restauración e reconstrución poderán revisarse puntualmente algunhas solucións que redunden na mellor interpretación e uso das técnicas tradicionais. Ademais, tendo en conta que na actualidade a función esencial deste conxunto é propiamente cultural, poderán acometerse melloras para o uso dos visitantes e unha óptima valoración e interpretación do conxunto.