O Pladiga incorpora un novo sistema informático para dar maior seguridade e coordinación aos 7.000 efectivos que este verán loitarán contra o lume

A actualización do Plan de Prevención e Defensa Contra os Incendios Forestais de Galicia (Pladiga) incorpora un novo sistema informático que permitirá dotar de maior seguridade e coordinación aos 7.000 efectivos que este verán loitarán contra o lume na nosa comunidade. Por medio das Tecnoloxías da Información e a Comunicación (TIC) será posible visualizar, en tempo real, a todo o persoal e medios materiais que conten con emisora, o que redundará, ademais, nunha maior axilidade no despregue do dispositivo.

Esta novidade foi destacada hoxe polo director xeral de Ordenación Forestal, Tomás Fernández-Couto, na presentación da actualización deste plan, que se fai efectiva logo de que o Ministerio de Agricultura, Alimentación e Medio Ambiente (Mapama) dera a coñecer os detalles da campaña de lumes deste verán para toda España.

Dos 7.000 efectivos que integran o operativo, uns 5.700 son profesionais da Xunta, que estarán apoiados por persoal do Mapama, do Exército e dos Corpos e Forzas de Seguridade do Estado. Ademais, para a loita contra o lume disporase de arredor dunha trintena de medios aéreos –entre os propios da Xunta e os que aporta o Estado– e 360 motobombas da Administración autonómica, dos concellos e dos parques de bombeiros, aos que se engaden cisternas, pas e outros vehículos. Tanto os medios humanos como materiais –incluíndo os aéreos– son idénticos aos do ano pasado e están xa listos para o seu despregue a partires do vindeiro 1 de xullo por todo o territorio galego.

Fernández-Couto destacou que as principais novidades desta actualización teñen que ver con melloras relacionadas coa incorporación das últimas tecnoloxías ao traballo de prevención, defensa e extinción de incendios forestais. Así, o director xeral explicou que a posta ao día do programa informático de xestión de lumes permitirá visualizar, en tempo real, a posición no territorio de todo os profesionais e medios que teñan emisora, o que representa un gran avance no reforzo da seguridade do persoal e a coordinación do dispositivo. Ademais, facilitará unha más áxil mobilización de medios por parte dos centros de coordinación e unha redución dos tempos de desprazamento ás alarmas e aos lumes, por medio de buscas avanzadas con puntos quilométricos, filtros toponímicos, automatismos a partir de posicionamento en tempo real e cartografía navegable.

Visor 3D e simulador de incendios

O director xeral sinalou tamén que haberá un visor 3D e un simulador de incendios e de acceso automático a datos de predición e observación meteorolóxica, especialmente útiles para a xestión dos lumes de dimensións considerables. Todo isto –remarcou– supón un “salto cualitativo” na loita contra os incendios, ao incorporar os últimos avances no eido das Tecnoloxías da Información e a Comunicación (TIC).

O principal obxectivo do Pladiga, segundo detallou Fernández-Couto, é reducir ao mínimo posible os danos ecolóxicos, económicos e sociais producidos polos lumes, dentro dos recursos dispoñibles. Ademais, existen unha serie de obxectivos “de control”, que concretan esa finalidade xeral. Entre eles, fíxanse como metas non superar a media de 3 hectáreas por lume nin a media de 1 hectárea de superficie arborada afectada por lume. Tamén, manter o número de incendios maiores de 25 ha por baixo do 2% do total e a porcentaxe de lumes menores ou iguales a 1 ha por riba do 70% do total.

Responsabilidade

O director xeral apelou unha vez máis á responsabilidade da sociedade galega en xeral e das administracións públicas con competencias na materia sobre a necesidade de cumprir a lei para previr os incendios, especialmente no relativo ás distancias das plantacións forestais aos núcleos habitados e a estradas e pistas. Dixo que o respecto escrupuloso da normativa redundará nunha maior seguridade das persoas e tamén dos bens non forestais.

Sinalou que por parte da Xunta faise un esforzo importante para axudar os municipios nestas labores, por medio de convenios de colaboración específicos para prevención e defensa contra os lumes, que no período 2016-2018 suporán unha achega de case 33 millóns de euros.

Fernández-Couto insistiu tamén na necesidade de seguir illando os incendiarios e denuncialos con firmeza, para que non se sintan amparados na súa actuación delituosa criminal e lembrou que está a disposición da cidadanía o teléfono 085, ao que deben chamar cando detecten un lume forestal.