O PP DE TOMIÑO CRITICA QUE NOS ORZAMENTOS DE 2016 SE REDUZA O GASTO REAL NUN 55% MENTRES SE AUMENTA OS SOLDOS DOS MEMBROS DO GOBERNO

O máis chamativo para o Grupo Popular é que diminúa o investimento real que repercute no beneficio dos veciños de Tomiño ou o gasto en persoal mentres se aumenta a cantidade destinada aos soldos dos membros do goberno, pasando de 145.000 euros a 153.700 euros, e se aumenta no próximo ano as dedicacións exclusivas, pasando de 3 a 4 concelleiros que terán un salario do concello.

Segundo o voceiro popular, a única preocupación que ten o goberno local neste momento céntrase única e exclusivamente nos seus propios intereses, agora xa non lles interesan os veciños, e a mellor mostra son os números que presentan os orzamentos do próximo ano.

Uns orzamentos que supoñen, a criterio dos populares, un completo engano aos veciños e que demostran ademais que os orzamentos de 2015 foron electoralistas, con actuacións que se acometeron a dous meses de celebrarse ás eleccións.

A modo de exemplo, o voceiro popular explica que o investimento real pasa do 900.000 euros de 2015 aos 500.000 en 2016, o que supón unha redución de un 55%, polo que se ve reducido o gasto en saneamento, en pavimentación ou mellora de camiños ou a partida de parques e xardíns.

"Venden o saneamento como algo primordial para o goberno do BNG e para 2016 destinan 120.000 euros, cando no orzamento do 2015 foron 300.000", sinala González Miranda.

A pavimentación ou mellora de camiños redúcese tamén de 80.000 a 30.000 euros, e a partida de parques e xardín sofre unha redución do 50%, pasando de 28 a 14.000 euros. González Miranda destaca que estas accións foron levadas a cabo nos dous meses antes das eleccións municipais.

O voceiro popular bota en falta tamén, máis investimento en cultura, onde só se destinan 30.000 euros, o apoio ao comercio, ou o deporte, a pesar de que os clubes deportivos non saben o que lles ampara o próximo ano.
Son, segundo Esteban González, uns orzamentos moi curiosos, onde te podes atopar con cousas como que se van destinar 30.000 euros a un estudo no que se vai analizar como mellorar o gasto en asuntos sociais, despois de que levan 8 anos gobernando.