O PP PIDE Á DEPUTACIÓN QUE NON ABANDONE A MARCA TURÍSTICA RÍAS BAIXAS

Así o defenderon os populares esta mañá, nunha rolda de prensa na que o deputado Chema Figueroa destacou o gran esforzo que se fixo desde a institución provincial nos últimos dez anos en materia de turismo, traballo que, xunto á importante profesionalización e implicación do propio sector, permitiu avanzar de xeito moi importante. Subliñou que o turismo xera o 12% do emprego e aporta o 11% do PIB da provincia de Pontevedra, e destacou o gran papel do sector privado, de empresas e asociacións que son exemplo a nivel nacional polo seu traballo.

A un mes de que se celebre a Semana Santa e, polo tanto, de que comece a temporada alta de turismo, os populares amósanse preocupados pola falta de actuacións e iniciativas que se están levando a cabo en materia turística desde a institución provincial. Recorda que o apoio que a Deputación de Pontevedra ofrecía aos 62 concellos da provincia era fundamental, e que pasaban por mellorar as infraestruturas e os servizos turísticos, desde a sinalización, ata a atención turística, plans de calidade, formación, bandeiras azuis, plans de accesibilidade... Pero tamén subliñou que a aposta que tiña o anterior goberno por potenciar novos sectores turísticos, como o turismo náutico, o turismo rural, o termalismo, o turismo gastronómico, de praias ou etnográfico, foron fundamentais para situar a marca Rías Baixas.

Nesta liña, Chema Figueroa dixo que nos últimos meses o goberno da Deputación esqueceuse de todas estas cuestións, a pesar de que ten medios suficientes para poder levar a cabo todo este traballo. "O goberno non se pode esquecer de que o turismo é un mercado estratéxico na nosa provincia", criticou, e por ese motivo defende que é importante traballar pola defensa, a calidade, a excelencia e a promoción das Rías Baixas. "É unha aposta segura para converter este destino en competitivo e diferenciado. Nós queremos que o turismo continúe sendo un sector estratéxico para a provincia", engadiu.

ESPAZO DE COMUNICACIÓN
Os deputados populares ofreceron a rolda de prensa no espazo que a Deputación de Pontevedra habilitou para os grupos políticos, que está no soterrado do edificio administrativo. A voceira Nidia Arévalo dixo que non é o lugar adecuado, non é cómodo non para os deputados, pero moito menos para os propios xornalistas, máis cando na Deputación hai outra sala totalmente acondicionada e habilitada para ofrecer as roldas de prensa.

Sobre a convocatoria que os socialistas tiveron esta mesma mañá nese espacio de comunicación, a voceira dos populares dixo que non ten ningunha dúbida de que ía ser a única en moito tempo que ían ofrecer nese lugar e que a ofrecían por cuestións de imaxe e para intentar aparentar que todos son iguais, cando a realidade é que hai deputados de primeira e de segunda, a pesar de que o PP é o grupo maioritario da Deputación.