O PP sinala que a Deputación é a única responsable do estado de deterioro e abandono dos castros da provincia

"Estamos sorprendidos, non entendemos a estratexia que está seguindo Carmela Silva, porque o convenio é moi claro e as labores que lle corresponden a cada un están perfectamente recollidas no protocolo", sinalou Nidia Arévalo. Nesta liña, cuestionou "como pretenden que o Ministerio de Fomento poña en marcha as labores de musealización desde xa cando os castros amosan esta imaxe de abandono e cando aínda non está rematada nin a limpeza nin a consolidación". Destacou que teñen unha imaxe tan lamentable que ata algúns concellos están asumindo as tarefas de limpeza e corte das herbas.

A voceira popular salientou que desde o Ministerio lles trasladan que se está cumprindo co establecido, que hai comprometidos 4,3 millóns de euros para a musealización e sinalización, e que esta partida está garantida nos orzamentos xerais do estado. Ademais, para levar a cabo esta labor, o Ministerio xa convocou e adxudicou un concurso de ideas e xa están redactando a imaxe da ruta e os proxectos adaptados para os diferentes castros da provincia.

"Non sabemos se a presidenta está intentando desviar a atención e non ter que comprometer ese millón de euros que aínda está pendente, ou si o que busca é seguir a liña do alcalde de Vigo de apostar pola confrontación continua con todas as administracións, cos concellos e cos colectivos", engadiu.

Neste senso, pide a Carmela Silva "que cambie de actitude, que xa vale de confrontación e de oposición constante", e recorda que a Deputación é unha institución que ten que estar ao lado dos concellos, dos colectivos e colaborar co resto de administracións. "Non queremos unha presidenta como o alcalde de Vigo, sabemos que é da súa escola, pero lle pido que cambie as tornas, e que tenda a man a quen quere axudar, que tenda a man a todas as administracións, aos concellos e aos colectivos".

Como exemplo, o deputado Jose Enrique Sotelo referiuse ao estado do castro do Facho de Donón, en Cangas. Salientou que na Deputación de Pontevedra "hai un goberno escapista, que o único que pretende é culpar aos demais dos seus problemas, non sei si por falta de iniciativa ou de capacidade". Ademais, critica o "total desinterese" por un dos lugares arqueolóxicos máis importantes e interesantes da provincia, e considera que "a única explicación que ten é o pasotismo e a falta de iniciativa da Deputación, e non se poden escudar en que outros non fan o seu traballo".

Tamén a deputada Salomé Peña referiuse ao Monte do Castro, en Ribadumia, e recordou que desde finais de 2015 o PP está denunciando o abandono do xacemento. "Durante todos estes meses non se fixo ningunha labor de mantemento, e todo o invertido durante estes anos está soterrado baixo maleza". Ademais, criticou que "esa foi a estampa que nós estivemos amosando a todos os visitantes durante este verán".

Salomé Peña criticou con dureza que "durante estes meses o Concello e a Deputación estiveron pasándose a pelota e agora, despois desa imaxe lamentable, queren trasladar as culpas ao Ministerio".