O programa de maiores en Tomiño remata a súa actividade anual cun concurso de postais de Nadal

Datos do programa de maiores
O programa de maiores da Concellaría de Servizos Sociais do Concello de Tomiño, que dirixe Cristina Martínez, organiza unha serie de actividades gratuítas, co fin de promover o envellecemento activo da poboación.

Tres grandes liñas de traballo forman parte do programa levado adiante polo Concello coa colaboración das entidades para persoas con discapacidade Vontade e COGAMI, e gabinetes pedagóxicos, que permiten ás persoas de idade avanzada manter áxil as áreas cognitiva, física e social.

O obradoiro "Activa a túa mente", ten coma finalidade estimular e manter as capacidades mentais e retardar o avance de enfermidades neurodexenerativas. "Tratamos de mellorar as capacidades cognitivas dos usuarios, e ademais, estes talleres funcionan coma un espazo de ocio e distracción "no que se fomenta a relación interpersoal e o traballo en equipo, logrando reducir os niveis de ansiedade e depresión", explica a psicopedagoga Bibiana Álvarez.

Actividades relacionadas coa linguaxe, exercicios de vocabulario, frases e refráns, lectura, etc., intercálanse coa resolución de problemas da vida diaria, xogos de cálculo mental, sudokus, tarefas para exercitar a atención, a concentración, a memoria, a planificación, etc.

A metodoloxía que se emprega tenta ser o máis dinámica posible, buscando a participación e a integración de todos os asistentes.

"Dende o comezo da actividade, a melloría que se notou nos usuarios do taller é asombrosa, tanto no seu nivel cognitivo persoal coma na integración grupal que se alcanzou", asegura Bibiana Álvarez.

Por outra banda, os maiores realizan diferentes exercicios de "movemento terapéutico". A idade e patoloxías dos participantes non é un problema, xa que o nivel de esforzo está regulado e adaptado ás capacidades de cada quen.

Movemento das articulacións, exercizos de coordinación, psicomotricidade , reforzo da musculatura, axilidade, equilibrio, e forza son outras actividades físicas que tamén se realizan dentro do programa municipal.

Por último, dentro da denominada "educación non formal", desenvólvense actividades para fomentar a integración e participación social, proporcionando recursos e estratexias que permitan un desenvolvemento individual equilibrado. Con este fin, organízanse obradoiros manipulativos (masa de sal, flores de papel reciclado) xogos populares, pasatempos, roteiros e saídas; visitas culturais, etc.