O RÍO MIÑO PRESENTA A SÚA CANDIDATURA AOS FONDOS EUROPEOS PARA INVESTIR 7,5 MILLÓNS DE EUROS NO TERRITORIO TRANSFRONTEIRIZO

Obxectivo: o turismo internacional
Dentro do concepto 'Dous países e un destino' e seguindo a premisa de que o val do Miño transfronteirizo incorpora moitas potencialidades, o proxecto presentado pretende traballar a partir dunha marca (Río Miño) forte e competitiva, e estruturar unha oferta turística a través de actividades conxuntas que, ademais, implicarán unha maior preservación dos espazos naturais.

Na candidatura, o río Miño transfronteirizo é presentado como un dos territorios máis interesantes a nivel europeo por ser a zona de fronteira con maior porcentaxe de área protexida e clasificada en todo o territorio estatal, así como tamén unha das maiores da Europa. Sublíñase que o río Miño está bastante consolidado no mercado nacional como destino, se ben o desafío que agora se presenta é "ser capaces de aportar un valor engadido ao nivel internacional".

Accións específicas ata 2019
A presente candidatura desenvólvese en catro actividades complementarias con accións específicas que se executarán ata o 31 de decembro de 2019. O investimento global de todas as actuacións concretas ascende aos 7,5 millóns de euros, cunha achega do 75% de fondos comunitarios.

O fundamental da proposta para o Interreg é estruturar e consolidar a marca 'Río Miño' a través da elaboración dun plano estratéxico de marketing territorial. Esto executarase en primeiro lugar na defensa do proceso de candidatura do estuario do río Miño a paisaxe cultural UNESCO con eventos de promoción interna e externa.

A segunda actividade versará sobre a preservación e interpretación do patrimonio natural transfronteirizo tratando de mellorar o seu coñecemento, os recursos naturais e os novos modelos de turismo verde na rede de espazos naturais tanto de montaña como de río.

En terceiro lugar sitúase a valorización conxunta dos recursos económicos do Río Miño. Procurarase o desenvolvemento do produto turístico transfronteirizo baseado no patrimonio natural e cultural, a posta en valor do produto da pesca e a creación de estruturas de apoio ás actividades promovidas polas empresas de animación.
Por último, traballarase na cualificación e posta en valor da rede de percorridos transfronteirizos a través de modelos de sinalización de rutas transfronteirizas e de pequenas intervencións co obxectivo de vertebrar o espazo común e a rehabilitación do patrimonio natural e cultural do río Miño.

Unimiño, entidade encargada de coordinar a proposta da candidatura, ten como socios á Deputación de Pontevedra ( representante dos concellos de A Guarda, O Rosal, Tomiño, Tui, Salvaterra, As Neves, Arbo e Crecente), así como á CIM Alto Minho (cos municipios de Paredes de Coura, Melgaço, Vila Nova de Cerveira, Valença, Monção e Camiña), á Fundación Centro de Estudos Eurorrexionais Galicia-Norte de Portugal, ao Centro Tecnolóxico del Mar e á Universidade de Vigo.

O reaproveitamento e a valorización do río Miño é un tema que, hai xa varios anos, suscita a preocupación e o interese de diversas entidades de Galiza e o norte de Portugal e que levou, o 10 de marzo de 2015, á subscrición do Pacto do Río Miño Transfronteiriço. Según subliñou Uxío Benítez, "a presentación da candidatura Visit Rio Miño xorde como reforzo e concreción dun conxunto de vontades dinamizadoras, entre as que está a da Deputación de Pontevedra, cun denominador común que é o treito internacional do río Miño".