O Rosal amplía o seu programa de compostaxe doméstica co apoio de Sogama

Con tal fin, formalizou unha nova colaboración con Sogama  a través da cal a compañía cedeu ao concello 28 novos recipientes (de 350 litros e fabricados con materiais reciclados e reciclables) para que sexan distribuídos entre outras tantas vivendas unifamiliares que dispoñan de terreo (horta ou xardín) no que aplicar o compost resultante.

Desde o ano 2014, e ata o día de hoxe, a Sociedade Galega do Medio Ambiente entregou en O Rosal preto de 200 composteiros, permitindo que igual número de fogares participen nesta iniciativa e contribúan a alcanzar os beneficios derivados da mesma.

BONDADES AMBIENTAIS, ECONÓMICAS E SOCIAIS

Neste sentido, e desde a dimensión ambiental, cabería sinalar que, reciclando a materia orgánica en orixe, que vén supoñer en torno ao 42% dunha bolsa de lixo tipo, resulta posible diminuír a frecuencia de recollida e transporte do residuo xenérico, coa conseguinte redución de emisións de CO2 á atmosfera. Ademais, ao entregar menos residuos á empresa pública, minórase o importe da factura a pagar polo concello, sen esquecer as bondades sociais do sistema, xa que se recupera unha práctica tradicional no rural galego, como é

a segregación dos restos orgánicos para alimento do gando e/ou elaboración de compost. Ademais, ao separar a fracción orgánica, mellora a selección do resto dos materiais, propiciando igualmente unha menor frecuencia dos desprazamentos que a poboación debe facer ata os contedores de recollida selectiva ubicados nas vías públicas, toda vez que o papel/cartón, os envases e o vidro poden almacenarse varios días nas casas sen riscos de cheiros.

O seguimento do programa realízao directamente o persoal da área de Medio Ambiente do concello, que visita periodicamente cada unha das casas incorporadas ao sistema para comprobar o estado do composteiro, a técnica aplicada, solventar dúbidas, corrixir erros e levar a cabo labores de asesoramento. O obxectivo último desta minuciosa tarefa é que os veciños logren transformar a materia orgánica en compost e que este abono natural substitúa aos fertilizantes químicos e cumpra con todos os requisitos impostos pola normativa vixente e a súa aplicación na agricultura non estea suxeita a restricións.

A formación dos participantes corre igualmente a cargo da Concellería de Medio Ambiente do ente local, que conta con profesionais expertos na materia.

Ademais, Sogama puxo a disposición dos interesados unha páxina web específica www.compostaconsogama.gal, na que estes poderán facerse con diversos recursos didácticos e divulgativos cos que conseguirán mellorar o seu labor no ámbito da autocompostaxe.