O Rosal mantén a súa -Memoria viva-

Este venres 22 de xullo, o concello do Rosal presenta, ás 20.30 horas no auditorio municipal, a segunda edición do proxecto ‘Memoria viva’, unha iniciativa coa que se procura protexer e manter presente o patrimonio inmaterial do Rosal, así como o coñecemento e a memoria que atesouran as persoas maiores do municipio.

Nesta segunda edición, Carmen Piedra Pérez e Isaac Penela Carbajales son os protagonistas dos dous vídeos que recollen a través das súas lembranzas parte da súa vida pero tamén as formas de vivir, de pensar, de crecer, de entender as tradicións e mesmo os costumes de toda unha época. O proxecto complétase con dous libros de pequeno formato, coleccionables coas entrevistas mantidas con Carmen e Isaac durante o proceso e que se suman ás de Nemesio Castro e Marcola González, cos que arrancou o proxecto.

Durante o acto presentaranse ambos os dous libros do proxecto, así como os dous vídeos documentais. A presentación será con entrada libre e de balde ata completar aforo.

Como explica a alcaldesa, Ánxela Fernández Callís, “non queremos que caia no esquecemento unha parte tan importante da nosa memoria individual e colectiva e dese desexo de conservar as historias que non están nos libros nace Memoria Viva. Seguiremos traballando para recuperar e recompilar as vivencias persoais, momentos históricos, formas de vida... dos nosos veciños e veciñas”.

Dende o Concello agradecen a colaboración de Carmen Piedra e de Isaac Penela, así como das súas familias, sen as que non sería posible ter chegado a realizar os traballos de documentación e gravación.