Oito expositores tomiñeses levan as súas novidades en planta ornamental e viveirismo a Iberflora 2016

Coplant (comercializadora que engloba aos viveiros: Vidaplan, Cultivos Casaíta, Rio Tollo e Galiplant); Brotes; Juan Peixoto e Verealeza, formaron parte do stand da Xunta de Galicia, constituíndo parte importante do mesmo.

Tamén a Asociación de Cultivos do Baixo Miño (acuBam) concorreu con stand propio.

A alcaldesa de Tomiño, Sandra González, quixo acompañar esta vez aos expositores e viaxou especialmente a Valencia. A rexedora visitou a feira o xoves 29 de setembro, onde puido comprobar o saldo moi positivo que tivo esta edición para os viveiristas tomiñeses, grazas ás relacións de negocio que se fraguaron.

O sector da agricultura e o viveirismo ten un claro peso económico na comarca do Baixo Miño, con máis de 600 ha. Cultivadas, que xera máis de 700 postos de traballo, na súa maioría, de mulleres.

Os principais ingresos económicos de Tomiño proceden da terra, sendo o tres eixos produtivos máis importantes a viña, o kiwi e a planta ornamental.

Dentro de España, a produción de kiwi concéntrase principalmente en Galicia, representando máis da metade da produción nacional, e desa porcentaxe o 60 por cento da superficie cultivada atópase no Baixo Miño.

O volume de negocio do sector de cultivos rolda os 50 millóns de euros anuais na comarca baixomiñota.

Iberflora é o certame máis importante do sector verde en España e un dos referentes en Europa, reúne a un total de 444 firmas expositoras. Delas, 342 son españolas e 102 son marcas estranxeiras procedentes de 18 países, cun peso maioritario de empresas procedentes de Alemaña, Francia, Italia, Reino Unido, Países Baixos e Portugal.

O "Salón da Árbore", o maior evento comercial nacional dedicado a empresas e profesionais no ámbito da arboricultura, foi unha das principais novidades desta edición.

As II Xornadas de Xardinaría e Paisaxismo tiveron igualmente unha excelente resposta por parte dos profesionais. Outro dos grandes atractivos da 45ª edición de Iberflora foi sen dúbida o primeiro concurso "Mestre Florista Iberflora", cunha notable participación de floristas.

Cun escaparate innovador, formado por 444 firmas expositoras, a mostra valenciana avanzou as tendencias da próxima tempada para axudar aos produtores a anticiparse ao mercado.