Positiva acollida dos novos servizos tecnolóxicos da Deputación aos concellos

En canto ao servizo de padrón municipal de habitantes, trátase dun servizo novidoso que pretende solucionar os problemas existentes nos concellos na actualidade que veñen dende a heteroxeneidade das solucións implantadas para xestionar o padrón, ata solucións desfasadas con mantementos incorrectos e que non se atopan integradas coa administración electrónica.
Segundo recordou Carmela Silva, "a Deputación de Pontevedra destina 500.000 € a este novo servizo, absolutamente gratuíto para os concellos de menos de 50.000 habitantes, que permite migrar os datos existentes nas aplicacións actuais de cada concello así como integralo na plataforma de administración electrónica, facilitando a xestión de expedientes e a realización de trámites municipais, evitando colas e desprazamentos". O servizo de padrón, que se ofertará a través dunha nube privada, inclúe tamén formación en cada concello e mantemento correctivo e evolutivo, co obxectivo de garantir a corrección de incidencias e a actualización e inclusión de novas funcionalidades.

Pola súa banda, o servizo de impresión e dixitalización xa xerou o interese de preto de 50 entidades locais, concretamente 30 presentaron a solicitude no rexistro e 19 manifestaron a intención de facelo de maneira inmediata. Mediante este plan, tal e como informou a presidenta, "obtemos condicións máis favorables e custes máis competitivos, facilitamos a xestión administrativa dos contratos e unificamos o parque de equipos de acordo ás necesidades de cada entidade. De feito, conseguimos un dos prezos máis baixos de todo o Estado". Este servizo naceu dun estudio previo realizado pola institución provincial que puxo de manifesto que o parque de sistemas de impresión é heteroxéneo, que o custe das copias e o mantemento é elevado, que as entidades locais contan con equipos de prestacións inadecuadas para as súas necesidades e que existe unha falta xeral de acordos definidos de maneira contractual que aseguren uns tempos axeitados de reparación e subministracións de consumibles.