Tomiño acollerá a visita dunha delegación ministerial de Guinea Bissau

A hora estimada de chegada ao Concello de Tomiño é as 10.30. Unha vez recibida, conducirase á delegación ao salón de plenos. Alí realizarase unha presentación sobre o Mercado Municipal, como resultado da aposta polas políticas de desenvolvemento local, así como polos produtos propios.
Deste modo trataremos de dar resposta ao obxectivo da visita, que é coñecer o impulso municipal das iniciativas económicas locais e os axentes de desenvolvemento económico local.

A continuación visitarase o mercado in situ, realizando un roteiro que finalizará co convite a un pequeno almorzo, no propio mercado.
A delegación estará conformada polas seguintes persoas:
- Sola Naquilin Nabitchita, Ministro da Administración Territorial da República de Guiné-Bissau
- Micailo Biai, Director de Servizos de Licenciamento e Incentivos ao Investimento
- Mahalam Mane, Director Xeral do Programa de Gobernación e Desenvolvemento Local de Guiné-Bissau (PNUD)
- Angela Abdula, Asesora Técnica Principal do Programa de Gobernación e Desenvolvemento Local de Guiné-Bissau (PNUD)
- Iván Arizcurinaga Vásquez. Consultor do Programa de Gobernación e Desenvolvemento Local de Guiné-Bissau, impulsado polo PNUD.

Esta delegación chegará a Galiza o luns 29 de maio, e marchará o día xoves 1 de xuño, tras pasar por Tomiño, entre outros municipios galegos, así como pola Deputación de Pontevedra.