TOMIÑO COMPLETA O SANEAMENTO DOS BARRIOS PRÓXIMOS AO NÚCLEO URBANO CUN INVESTIMENTO DE 850.000 EUROS

Deste xeito, segundo indica o concelleiro de Vías e Obras, Fran Campo Lago, vaise completando a rede municipal de saneamento de Tomiño, co esforzo que significa dotar desta infraestrutura a un municipio que se caracteriza pola súa grande extensión (106 km. cadrados) e dispersión (15 parroquias, cun total de 13.860 habitantes).
Campo Lago afirma que as prioridades deste goberno no tema de saneamento foron dúas: dotar de alcantarillado ás poboacións próximas ao casco urbano, coma a do barrio da Rocha, e zonas que non necesiten bombeo.

Neste sentido, a alcaldesa de Tomiño, Sandra González Álvarez, lamenta a decisión do Goberno Autonómico do PP, de paralizar as obras do Treito 3 do Colector Xeral (con proxecto, permisos e dotación económica da Xunta do Bipartito), privando do servizo de saneamento a varias da parroquias máis populosas do concello, como é o caso de Amorín, Carregal e Currás, que concentran perto de 3.000 habitantes.

Salienta a rexedora que despois de oito anos de goberno, a porcentaxe de vivendas con saneamento rolda xa o 60%, cifra que case triplica a porcentaxe realizada por gobernos anteriores (21%).
Asemade, o investimento en obras de saneamento, nas últimas dúas lexislaturas e no que vai desta terceira, achégase aos 6 millóns de euros.