Tomiño participa na limpeza simultánea de ríos impulsada por Adega

Como cada ano o Concello de Tomiño colaborará coa limpeza simultánea de ríos impulsada pola Asociación para a Defensa Ecolóxica de Galiza (Adega) ao abeiro do Proxecto Ríos. O vindeiro 27 de setembro voluntarios e voluntarias participarán nesta actividade que, baixo o lema de ‘Móllate polos ríos’, promove a retirada de lixo da beira dos ríos, coa que se busca achegar un gran de area na conservación dos ecosistemas fluviais e concienciar á veciñanza.

A Concellería de Medio Ambiente e a OMIX de Tomiño son as encargadas de organizar as dúas saídas programadas en Tomiño, que se terán lugar de 10.00 a 13.00 horas. Un dos grupos participantes atoparanse no antigo embarcadoiro do ferry en Goián, mentres que outro partirá da Praza do Seixo de Tomiño, fronte ao Concello.

A actividade está aberta a todos os públicos. Recoméndase ás persoas participantes que leven roupa cómoda para camiñar, luvas, calzado para a auga ou de recambio e de ser posible pinchos para recoller lixo en sitios pouco accesibles.

Dende a organización aconsellan non arriscar a integridade física para coller lixo en zonas perigosas ou pouco accesibles; pedir axuda a outros participantes para recoller as cousas máis pesadas; extremar as precaucións para retirar vidro, ferralla ou materiais cortantes; non traballar de costas ao río sobre todo se se está arrincando algo que está enterrado para evitar o risco de caer ao auga e ter coidado coas zonas de corrente forte e profunda.