Tomiño rende homenaxe a Daniel Pino Vicente, destacado sociólogo e veciño de Forcadela

Ademais de políticos e pobo en xeral, o homenaxeado estivo arroupado por familiares, amigos e colegas, que se achegaron até a Praza do Seixo, fronte á Casa do Concello, dende diferentes puntos de Galicia. Entre os convidados atopábase tamén a maioría dos tomiñeses distinguidos en anos anteriores.
Daniel Pino foi o primeiro en tomar a palabra para agradecer sinceramente o recoñecemento popular. "Estou sinceramente agradecido a esta corporación liderada por Sandra, que ten levado a Tomiño a recuperar un pulo que tiña perdido. Gracias, pois. Noraboa e adiante. Nesa viaxe que Tomiño está a levar conten comigo en todo o que eu poda ofrendar", sinalou visiblemente emocionado.
A continuación deu lectura a un poema do seu libro No leme das lembranzas, "para acreditar o meu amor pola miña terra".

A alcaldesa, pola súa banda, definiu a Daniel Pino coma "un adiantado" para a súa época, salientando a súa traxectoria no ámbito do urbanismo dende una perspectiva sociolóxica, ademais de resaltar os seus valores persoais. "Daniel Pino é un tomiñés adiantado ao seu tempo, unha persoa que tivo claro dende neno que tiña que estudar para progresar, que viaxou por Europa, que sabía que a democracia era o futuro, cando apostar por ela era arriscar a vida; que tivo claro que coñecer a pel e a textura do país era importante para ordenalo e para darlle un futuro".

Daniel Pino Vicente é un profesional respectado en todo o territorio español coma un dos grandes estudosos do planeamento e do urbanismo, o que lle valeu numerosos premios e distincións nacionais e internacionais.