Un nova taxa de lixo axustada á realidade do servizo e socialmente máis xusta en Tomiño

A taxa vixente ate o momento, a máis baixa da comarca, non foi modificada dende hai 13 anos, e foi creada para financiar os custos da recollida de lixo. Actualmente estes custos ascenden a 60 euros por familia cada ano, moi lonxe do recadado coa tarifa actual. Ademais, a adhesión do Concello de Tomiño a SOGAMA implicou un gasto engadido, que fixo que o tratamento total do lixo no noso concello teña hoxe en día uns custos aproximados de 110 euros por familia e ano, dos cales non se cobran mediante a taxa de lixo nin unha terceira parte.

"Por tanto, o Concello está subvencionando dúas terceiras partes do custo do lixo, gastando máis de 400.000 euros ó ano dos impostos de todos, que poderían dedicarse a financiar outras necesidades máis importantes como axudas sociais, infraestruturas, saneamento, etc.", explica a concelleira de Medio Ambiente, Mª Xosé Vázquez Rodríguez. "E o máis importante -prosigue- no sistema actual todos pagamos por igual, independentemente da nosa renda ou das nosas circunstancias familiares. Isto mellora coa nova taxa pois as familias que menos ingresos teñan poderán incluso estar exentas de pago, contemplando tamén rebaixas moi significativas para familias que teñan que convivir con situacións de discapacidade ou minusvalía, ou para familias numerosas ou monoparentais con nenos en idade escolar ".

Coa nova taxa, aínda non se recuperan totalmente os custos do servizo. Segundo a concelleira, "Aínda teremos un déficit de máis 30 euros por familia e ano, que intentaremos cubrir conseguindo aforros de custes. Imos poñer en marcha varias medidas paralelas como melloras na recollida selectiva, sistemas de compostaxe doméstico e comunitario, recollidas específicas, etc.".

"Por todas estas razóns, cremos que a creación desta nova taxa é unha necesidade xa que anterior era deficiente no importe, nos conceptos que cubría, no texto normativo, que resultaba obsoleto, no tratamento de negocios e empresas, e no feito de non ter en consideración a situación económica e persoal das familias", conclúe Mª Xosé Vázquez Rodríguez.