Durante a mañá do martes os operarios atenderon un desprendemento de terras na estrada provincial Marín-Penizas e varias caídas de árbores e sumidoiros anegados

O deputado de Mobilidade Uxío Benítez avoga por "un correcto mantemento da rede viaria provincial para garantir a seguranza viaria"

Ante a previsión de alerta laranxa anunciada dende MeteoGalicia para o mércores a Deputación de Pontevedra ten previsto poñer en activo as tres brigadas habituais de mantemento das vías provinciais e engadir outras cinco restantes 'en retén' co fin de ofrecer un bo servizo no caso de que se produzan incidencias. As brigadas que estean de 'garda localizada' desprazaranse incluso fóra da súa área de influencia de darse situacións de emerxencia, xa ben comunicadas dende o 112, polas policías locais dos concellos, Guardia Civil ou mesmo os veciños.
O deputado de Mobilidade Uxío Benítez, responsable das brigadas provinciais, sinalou que o traballo dos operarios é básico, xa que "un correcto mantemento da rede viaria provincial é fundamental para garantir a seguranza viaria, máximo en momentos no que as circunstancias climatolóxicas non son as máis axeitadas".
Nesta mañá unha das brigadas da zona Centro da provincia recibiu un aviso de alerta a través dos servizos de emerxencia sobre as 13.50 horas polo desprendemento de terras na EP-1201 entre Marín-Penizas, no lugar de Moreira, debido á acumulación de auga caída o luns. Así mesmo, igual que hoxe, na xornada de onte as brigadas tamén procederon á retirada de árbores en diferentes puntos, así como á limpeza de arrastres da chuvia que taponaban sumidoiros, tubaxes e arquetas, eliminando balsas de auga das calzadas e apartando árbores, ramas e sinais tiradas polo vento que impedían o tránsito.
O sistema de incidencias nas estradas provinciais funciona 24 horas ao día 365 días ao ano. Así, o pasado día de Noiteboa, os equipos de operarios da Deputación de Pontevedra tiveron que acudir á limpeza de varias vías por manchas de gasoil e outros líquidos deslizantes nos concellos de Soutomaior, Catoira e Gondomar por avisos do 112. No día de Nadal tamén foi preciso actuar por varias caídas de árbores e sinais e por desprendementos de terra e pedras nos concellos de Baiona e Tomiño, entre outros.

No que vai de ano o rexistro do servizo de emerxencias da Deputación de Pontevedra leva contabilizadas máis de 300 incidencias atendidas fóra do horario ordinario dos traballadores das brigadas ou en fin de semana. Estas actuacións súmanse aos traballos realizados de forma programada e aos que se comunican directamente ás brigadas sen pasar polo servizo de Control e Vixiancia.
Normalmente as emerxencias son comunicadas a través da Policía Local do concello afectado, da Guardia Civil, de alcaldes, concelleiros ou de calquera veciño, incluído tamén o servizo 112, que activa un protocolo de actuación propio. A maior parte das actuacións están relacionadas con caídas de árbores, accidentes, inundacións, desprendementos, fochancas, nevadas ou presenza de animais mortos. Tamén se recollen advertencias de semáforos avariados, de erros na sinalización, de retirada de elementos na vía, postes caídos ou tapas de sumidoiros en mal estado.
Hai tres brigadas na zona Norte da provincia con bases situadas en Lalín e Codeseda; tres na zona Centro con base en Pontevedra, e dúas na zona Sur, ubicadas en Gondomar e Ponteareas.