UXÍO BENÍTEZ ASEGURA QUE A DEPUTACIÓN ASUMIRÁ A EXECUCIÓN DAS ACTUACIÓNS DA CANDIDATURA -VISIT RÍO MIÑO- NA PROVINCIA

Obxectivos
A candidatura 'Visit Río Miño' ten como obxectivo a creación dunha marca común que atraia a uns tres millóns de turistas potenciais ao val do Miño. A súa intención é poñer en valor as potencialidades do río cun proxecto único e cohesionado dende as dúas partes da fronteira, facendo que esta se dilúa e que a colaboración pontevedresa cos concellos de Caminha, Vila Nova de Cerveira, Valença, Paredes de Coura, Monçao e Melgaço sexa transversal e multidisciplinar. "Trátase de potenciar de xeito sostible a identidade común da zona transfronteiriza a todos os niveis cunha estratexia única de territorio", sinalou o deputado Uxío Benítez.

A candidatura está formada por varias actuacións principais. A primeira e principal baséase na creación dunha imaxe de marca que abranga todo o territorio e que identifique a localización do Miño e as súas ofertas tanto directamente cara aos visitantes como a través da presenza en feiras e outros actos de promoción.

Por outra banda, e baseándose na sostibilidade dos proxectos, as actuacións transfronteirizas propostas estarán avaladas por estudos universitarios que analizarán problemáticas da área que inflúen nos recursos existentes que poden ser aproveitados económica e turisticamente, como pode ser un sistema de trazabilidade e calidade dos produtos da pesca artesanal.

Un terceiro eixo xirará en torno ás actuacións para valorizar espazos e contribuír á creación dunha rede de atractivos coordinada, como melloras de espazos e sendeiros de pescadores, muíños e pesquerías.

Smart Río Miño
Ademais de 'Visit Río Miño', os concellos galegos e portugueses impulsarán tamén outra candidatura denominada 'Smart Río Miño', que pretende levar adiante e consolidar unha estrutura para aplicar a estratexia conxunta de desenvolvemento do territorio transfronteirizo do Miño de forma continua no tempo. "Precisamos un instrumento para sentar as bases do futuro conxunto da zona e das liñas estratéxicas e actuacións a desenvolver, é dicir, unha nova asociación europea de cooperación transfronteiriza (ASCT) que priorice cales son os camiños a seguir, o que se podería chamar o obxectivo 'Miño 2020'", subliñou Benítez, que asegurou que a creación desta estrutura seguirá adiante aínda que non se obteña a subvención europea para poñela en marcha. O orzamento desta proposta conxunta da zona transfronteiriza entre Galiza e Portugal ascende a aproximadamente 800.000 euros.

Segundo explicou Uxío Benítez, o programa POCTEP ao que se presentarán as dúas candidaturas transfronteirizas nas que están implicadas a Deputación de Pontevedra e a CIM Alto Minho (organismo ao que pertencen os seis concellos portugueses) distribuirá no 2016 o 70% dos fondos totais dispoñibles. Haberá unha segunda convocatoria, pola que se repartirá o 30% restante na que é probable que se presenten novas propostas por parte da nova ASCT do Miño e incluso unha segunda parte das candidaturas xa anunciadas.