VALORACIÓN POSITIVA DOS REPRESENTANTES DE A GUARDA, OIA E O ROSAL SOBRE OS SISTEMAS DE COMPOSTAXE COÑECIDOS TRALA VIAXE A NAVARRA

A VIAXE A NAVARRA, XERME PARA POÑER EN MARCHA PEQUENAS EXPERIENCIAS DE COMPOSTAXE EN TODA A PROVINCIA
Alcaldes, concelleiros e técnicos agradeceron a iniciativa da Deputación e o asesoramento técnico que se dará neste mandato
A viaxe a Navarra organizada polo vicepresidente da Deputación César Mosquera para dar a coñecer novos sistemas de xestión do lixo aos concellos de Pontevedra ten xa o seu primeiro froito: son varios os municipios que teñen pensado implantar experiencias piloto de composteiros colectivos en barrios, parroquias ou núcleos de poboación de forma inminente. Así o manifestaron os representantes de Barro, Vilaboa, Lalín, Sanxenxo ou Valga, entre moitos outros.
Tódolos concellos presentes na expedición pontevedresa (26) mostraron a súa satisfacción pola experiencia da viaxe, ao poder coñecer in situ diferentes modelos de xestión do lixo e escoitar a técnicos pioneiros na compostaxe nas xornadas organizadas pola Universidade Pública de Navarra. Por todo isto tanto alcaldes como concelleiros e técnicos agradeceron a iniciativa ao responsable de Medio Ambiente da Deputación, o vicepresidente César Mosquera, así como a posta a disposición de técnicos durante este mandato. Pola súa banda, a deputada Eva Iglesias, destacou o interese mostrado en todas e cada unha das visitas, así como a participación e curiosidade mostrada en tódalas conferencias.
O programa deseñado pola Deputación incluíu unha visita a unha pequena instalación de compostaxe de Larrabetzu, onde se fai un tratamento comunitario entre familias e dous restaurantes que xestiona un agricultor da zona. Tamén se coñeceron as instalacións da nova planta de compostaxe de Epele, aínda sen poñer en marcha, e que polas súas dimensións é moi parecida á que se prevé instalar en Pontevedra (salvando diferencias técnicas).
Na segunda xornada da viaxe, os 45 representantes pontevedreses estiveron nas instalacións dos Traperos de Emaús, onde recibiron explicacións sobre o funcionamento de esta organización que ten como obxectivo darlle unha 'segunda vida' ao lixo. Tamén se visitou o Avicompo e o Parque dos Sentidos en Noáin, onde se utilizan as galiñas como volteadoras do compost.
Na terceira xornada visitáronse Irurtzun, Leitza e Ursurbil, tres localidades con composteiros comunitarios nas que os veciños se fan cargo do mantemento e da xestión. Na última vila está instalado un sistema de recollida porta a porta.
No curso de verán de Alsasua coñecéronse experiencias de Italia, Cataluña, Navarra, Ourense e Compostela da man de técnicos recoñecidos internacionalmente.

 

 

A Guarda
O concelleiro Paulino Rodríguez subliñou que tódolos modelos coñecidos en Navarra e País Vasco son aplicables no concello de A Guarda, pero destacou que os concellos non poden soportar económicamente en solitario o seu financiamento e posta en marcha.

 

"Hai dúas partes, sería bo que a compostaxe se xestionase a través dunha mancomunidade, xa que no Baixo Miño hai uns 60.000 habitantes e podería instalarse unha planta en calquera lugar", dixo, para engadir que " é primordial a concienciación previa da cidadanía e dos políticos".

 

Neste último ámbito explicou que no Concello de A Guarda estase traballando con moi bos resultados na recollida selectiva e nos puntos limpos. "Queremos manter unha reunión técnica coa Deputación para contar as nosas inquietudes. Hai que facer moitas valoracións antes de apostar por algo concreto", finalizou.

 

Oia
Gerardo Rodríguez considerou a visita a Navarra moi interesante. Calificou como "utopía" o chegar ao nivel de compostaxe desta comunidade e indicou que o grao da colaboración da xente é fundamental ao apostar pola recollida selectiva da parte orgánica do lixo. "Temos que saber transmitir á xente que esta tendencia é importante. Hai que recuperar produtos e reducir o lixo en xeral e a recollida porta a porta", dixo, para explicar que se se consegue que os veciños separen os restos de comida tamén se mellorará a recollida selectiva doutras fraccións "o que permitirá reducir os custes do tratamento dos residuos"
"Unha planta na mancomunidade sería ideal", pero nós comezaremos pola compostaxe da fracción vexetal dos céspedes e as podas, que teñen unha solución sinxela, "para que non vaia aos contentores e se recolla como un voluminoso".
 

 

O Rosal
A concelleira Charo Tabales suliñou que a aplicación da compostaxe como modelo alternativo de xestión de residuos non só é unha cuestión política. Tabales lembrou que dende 2011 ela mesma leva recorrendo domicilios(1.500 no último ano), colexios e facendo enquisas para informar e concienciar á veciñanza da importancia da recollida selectiva e dos tratamentos biolóxicos. "O fundamental é a concienciación da cidadanía e ter un apoio institucional, un asesoramento que podería ser compartido con outros concellos", dixo. En canto á viaxe a Navarra, Tabales afirmou que foi unha experiencia "extraordinaria única de aprender cousas e ver o que nos une -con Navarra e o País Vasco- aínda que son moi diferentes... Son aplicables moitas cousas de alí".
En canto ás experiencias coñecidas, a edil explicou que lle gustaría aplicar o sistema de recollida de lixo porta a porta no casco urbano así como
composteiros comunitarios nas parroquias. "Non se precisan grandes infraestruturas nos concellos, pero no Baixo Miño debería haber plans conxuntos a xeito de mancomunidade. Ten que haber unha continuidade no traballo, dar un tempo á reflexión, ver as propostas e a súa viabilidade", finalizou.