ESPECIAL - 25 ANOS DA FESTA DA LANGOSTA E DA COCIÑA MARIÑEIRA NA GUARDA

Pasadas as 20 horas comezaron a sonar os primeiros acordes da Agrupación Musical da Guarda nunha praza atestada de xente. Os veciños e veciñas da Guarda, e moitos dos visitantes que estes días pasean polas nosas rúas, quixeron estar presentes no inicio desta gran desta, polo que non dubidaron en encher a Praza para, nun primeiro momento escoitar o concerto que a Agrupación tiña preparado, e despois para escoitar o pregón.

O primeiro en subirse o balcón do Concello foi o alcalde da Guarda, Antonio Lomba, quen, moi emocionado falou dos seus recordos de neno nunha familia de mariñeiros. A primeira sorpresa nesta XXV edición da Festa foi a pequena homenaxe que o Concello quixo facerlle a Elicio Magallanes, impulsor da primeira edición. Elicio, acompañado do alcalde, subiu o balcón e non dubidou en ofrecer unhas palabras ós seus veciños e amigos.

Tras él foi a quenda do máis esperado, do pregoeiro desta edición, Yayo Daporta. Este chef, un dos máis xoves en conseguir unha estrella Michelín, recitou un emotivo pregón destacando a calidade dos produtos galegos e o saber facer da xente que vive en Galicia.

Despois das palabras, pasouse ós feitos. Tanto a corporación municipal, como o pregoeiro cambadés, e por suposto, as decenas de veciños e veciñas que estiveron presentes no primeiro acto, dirixíronse á carpa instalada no porto para dar por inaugurada a festa.

Yayo Daporta, acompañado polo alcalde e demais Concelleiros, foron parando nos diferentes postos gastronómicos para coñecer de primeira man os diferentes produtos que se ofertaban. O chef non dubidou en posar con langostas na man, con decenas de fans que o acompañaban no seu paseo ou incluso probar o doce máis característico da Guarda, o roscón de xema.

Cando Yayo Daporta xa vira os produtos e probara moitos deles, o chef cambadés subiuse ó escenario para facer unha demostración culinaria ante o público. Con dúass langostas que chegaron vivas a súa mesa, e unhas salsas baseadas entre outra cousas en cilantro e aceite de oliva, este cociñeiro demostrou as súas dotes creando un tartar e un carpaccio de langosta. Daporta foi mostrando e explicando cada paso ós presentes.

Dous nenos do público foron os afortunados e puideron probar estes pratos creados por un chef "Michelin".

Tras a exhibición, e despois da cena, os asistentes á festa gozaron da música da orquestra "América" ata altas horas da madrugada.

Ademais de ofrecer diversas receitas e unha calidade estupenda de produtos do mar, programáronse un sinfín de actividades para que, tanto os veciños e veciñas da Guarda, como os múltiples visitantes que en estas datas chegan a localidade, gozasen dun estupendo fin de semana.

Nesta XXV edición da festa, a música tivo un gran protagonismo, xa que estivo presente durante todolos días con actuacións de "O Trebón dos Xidos" con pasarrúas, actuación do acordeonista guardés Daniel Vilanova, do grupo local The Winning Numbers, Lou Reyes e fados portugueses a cargo de Claudia Madeira e Rui Teixeira.

	Fotógrafo:	Jorge Alonso Daldea
	Fecha:	3-5 Xullo 2015
www.infomiño.com © 2014. Todos los derechos reservados.	Cámara:	Canon EOS 350d

 FOTOS CONCERTO, PREGÓN E APERTURA CARPA

FOTOS CARPA E FEIRA DE ARTESANÍA