ESPECIAL - INAUGURACIÓN NOVO VIAL CG 4.2 GOIÁN-A GUARDA

Na mañá do Venres día 11 de Xullo de 2014 tiña lugar o acto de posta en Servizo dos primeiros 10km da CG 4.2 Tui-A Guarda, en concreto o treito III entre Goián e A Guarda.

Afectados das participacións preferentes e emigrantes retornados movilizáronse ó carón da rotonda de acceso a este novo vial en Goián, sendo atendidos polo Presidente da Xunta un representante de cada colectivo afectado ó final do acto inaugural. 

Neste acto estiveron presentes o Presidente da Xunta de Galicia, o Presidente da Deputación de Pontevedra, Alcaldes da Comarca, representantes de colectivos, institucións, asociacións, entre outros.

Este novo trazado de 10km de lonxitude ven a aliviar o exceso de tráfico na actual PO-552, reducíndo á metade o tempo de traxecto entre A Guarda e Goián e dotando dunha maior seguridade ós vehículos e viandantes.

Estes serán os primeiros 10 quilómetros da Vía de Altas Prestacións Tui- A Guarda, que entrarán en servizo a partires deste Domingo día 13 de Xullo de 2014 e no que se investiron preto de 60 millóns de euros.

Características técnicas

O novo vial de máis de 10km conta con dous carrís de circulación de 2,5m de ancho, beiravías de 2,5m e bermas de 0,75m facendo un total de 13,5m. Conta con 4 enlaces: Rotonda San Roque e Pintán na Guarda, rotonda do Morán no Rosal e rotonda de Goián en Tomiño. Neste vial atópanse 3 pasos superiores, 4 inferiores, un viaducto de 946m(Tamuxe) e 3 falsos túneis.Sobre a infraestrutura que se pon en servizo, o treito que une Goián e A Guarda, que contou cun investimento de preto de 60 millóns de euros, Feijóo resaltou que se trata dunha "actuación estratéxica" para o sur da provincia de Pontevedra e para a comarca do Baixo Miño, por canto incidirá na mellora da accesibilidade e a mobilidade, beneficiará os veciños e as empresas da zona e redundará, tamén, en novas oportunidades económicas e na creación de emprego e de riqueza.

O presidente da Xunta subliñou que esta é unha infraestrutura "segura" e "cómoda para os cidadáns", que beneficiará directamente aos case 40.000 habitantes dos concellos de Tomiño, O Rosal, A Guarda e Tui.

O titular da Xunta indicou que esta vía pon de manifesto o impulso que o Executivo autonómico está a facer de cara a favorecer a actividade económica nos concellos do Baixo Miño por canto que dará acceso –a través da glorieta de Pintán- ao futuro polígono industrial A Guarda-O Rosal. Unha obra que, xa desde agora, favorecerá a saída comercial das industrias que están asentadas nos polígonos da comarca, ao ver mellorada a súa conexión con Portugal. 

O presidente da Xunta abundou en que se trata dunha infraestrutura “de presente”, por canto repercute desde hoxe mesmo na accesibilidade e na mobilidade dos veciños destes concellos do sur da provincia de Pontevedra; pero tamén unha infraestrutura “de futuro”, xa que dará servizo ás empresas que se asenten tanto no polígono empresarial que está proxectado, A Guarda-O Rosal, como ás xa existentes, propiciando a xeración de actividade e a creación de riqueza e de novos postos de traballo.

Fotos de Jorge Alonso Daldea