O Rosal mobilízase contra o desmantelamento da Sanidade Pública

Tras os feitos acaecidos no Rosal o pasado mes de maio, no que un paciente tivo que ser trasladado nunha camilla por carretera ante a falta dunha ambulancia, o concello segue tendo que facer fronte a un continuo desmantelamento da atención primaria que non só afecta a todo o municipio, senón tamén á comarca. Ante a falta de medidas por parte do Sergas, a Plataforma para a Defensa da Sanidade Pública do Rosal conovoca a toda a veciñanza e establecementos do concello a unha manifestación na que se defenda un servzo de sanidade pública que cubra as necesidades da poboación cun paro de tres minutos o venres 15 ás 12:00 da mañán.

A Plataforma anima a todas as persoas a saír á porta ás 12.00 horas e facer ruído ou amosar os diferentes carteis alusivos que haberá á súa disposición nos establecementos rosaleiros, para defender así unha atención primaria de calidade. Nestes carteis figurarán mensaxes como ‘Queremos matrona para O Rosal’, ‘Queremos recuperar a médica de San Miguel’, ‘Por unha atención primaria digna’, ‘Sen pediatra dende abril de 2021’, ‘Unha soa médica para máis de 6.000 persoas’, ‘A Xunta pon en risco a nosa saúde’, ‘Mañá podes ser ti o que precise atención’ ou ‘Precisamos ambulancia medicalizada xa!’.

Ademais, convida a todas as persoas a facer fotos coas persoas que se teña arredor e envialas vía Whatsapp ao teléfono 618 64 38 05 para que se poidan difundir dende a Plataforma en Defensa da Sanidade Pública do Rosal e mostrar así a mobilización da veciñanza para que o centro de saúde do Rosal teña a dotación de persoal que lle corresponde e para que o servizo do PAC de urxencias da Guarda garanta a saúde de todos e todas e non poña en risco a vida das persoas.

Dende a plataforma lembran que o Sergas non só comunicou o desmantelamento do segundo equipo do PAC de urxencias da Guarda, senón que anunciou que a presenza de médicos no Rosal durante os meses de verán "ía estar complicada". Na actualidade, o concello conta cunha soa médica que atende aos 6.450 habitantes do municipio, feito que se suma a un servizo de urxencias mermado pola falta de equipos e persoal.