A Xunta concede unha axuda para conservar a Sobreira Natural do Faro en Oia, unha das poucas que existen en Galicia

A Xunta concede unha axuda para conservar e manter a sobreira do Faro no concello de Oia, unha formación que está incluída no Catálogo de árbores senlleiras.

O Diario Oficial de Galicia publica hoxe a Resolución da convocatoria de subvencións para apoiar as actuacións de mellora , protección e conservación, así como de divulgación, dos elementos incluídos neste inventario galego de elementos singulares, dirixidas ás entidades locais, así como aos propietarios ou entidades sen personalidade xurídica.

A sobreira está composta por exemplares de carballos, ameneiros e salgueiros nas zonas máis húmidas, con idades comprendidas entre 70 e 120 anos. Son individuos de pequenas dimensións, pero cunha masa moi interesante desde o punto de vista bioxeográfico, pois é un dos poucos sobreirais naturais de Galicia.

Neste caso, a axuda concedida -de 4.020,40 euros- permitirá sufragar actuacións de mantemento e conservación, como a realización de podas ou control da copa, e a aplicación de tratamentos fitosanitarios. Non obstante, os traballos deberán estar executados antes do 30 de setembro.

Elementos no Catálogo de senlleiras

O Catálogo galego de árbores senlleiras é unha ferramenta aberta e en constante actualización, podendo propoñer a inclusión de elementos novos os seus propietarios, as administracións, os centros de investigación ou asociacións e aquelas entidades privadas ou públicas que teñan entre os seus fins estatutarios a protección da natureza.

De feito, desde a aprobación do seu regulamento no ano 2007, foi obxecto xa de diversas revisións e periodicamente sométense a información pública novas propostas para valorar a posible incorporación de exemplares con valores salientables.

Na actualidade, forman parte do Catálogo un total de 182 elementos —144 exemplares e 38 formacións arbóreas— pertencentes a 79 especies diferentes e coa seguinte distribución por provincias: