Eva Vilaverde: -a pesar do aumento de adopcións, o abandono de cans non deixa de ser constante-

"A pesar do aumento ano tras ano do número de adopcións, o abandono de cans non deixa de ser constante nos diferentes concellos da nosa provincia, o que nos pon enriba da mesa un problema social moi complicado" asegurou esta mañá a deputada delegada do CAAN, Eva Vilaverde, na presentación da nova campaña de sensibilización sobre este problema. Baixo o lema "Abre os ollos fronte ao abandono", desde a Deputación elaborouse un vídeo que recolle unha situación habitual de abandono e co que se pretende, en palabras de Eva Vilaverde "chegar a un maior segmento de poboación e poder incidir nunha conduta máis respectuosa, responsable e cívica na tenza de animais".

Vilaverde fixo un repaso polos datos de abandono do primeiro semestre do presente exercicio, indicando que o CAAN xa leva contabilizadas 1.128 recollidas de animais procedentes dos 48 concellos da provincia adheridos. Deste total, a deputada explicou que 327 cans foron recollidos polos seus propietarios e 169 foron adoptados. Engadiu ademais que desde o ano 2013 desde o CAAN se realizaron máis de 7.000 intervencións "o que dá mostra do problema do abandono nos concellos da provincia". Ante esta realidade, e tras dúas campañas consecutivas centradas na adopción, "agora tocáballe a quenda á sensibilización sobre o abandono, e para iso quixemos meternos na pel do animal e ver a situación con outros ollos" asegurou a deputada. Tamén aclarou que "este ano cambiamos o formato e apostamos pola linguaxe audiovisual para que a mensaxe sexa máis directa e clara e cunha maior eficacia á hora de calar na veciñanza de toda a provincia, sexan de concellos adheridos ou non, porque fronte ao abandono non hai fronteiras". O vídeo será emitido en diferentes canles de televisión e tamén poderá verse a través das páxinas web de medios de comunicación on line durante o mes de agosto. "Escollemos agosto porque tradicionalmente ao ser un mes de vacacións preocupa especialmente o tema do abandono" afirmou a deputada nacionalista.

Un problema social
"Moitas veces pensamos no abandono como un problema illado, e identificámolo coa imaxe dun maltratador, pero o abandono é un problema social, derivado de prácticas que todos podemos ter en momentos determinados das nosas vidas" asegurou José Luis Pedreira, veterinario e membro do equipo técnico do CAAN. De feito, Eva Vilaverde explicou que a idea orixinal do vídeo de sensibilización da campaña xurdiu a partires do equipo do CAAN que "convive día a día cos animais recollidos e coas diferentes problemáticas que lles afectan". Así, o vídeo narra a historia dun can que convive cun meniño que segundo vai medrando vai cambiando o tempo que lle dedica ao animal por tempo que lle dedica a novas circunstancias que van aparecendo na súa vida, como os amigos, a parella ou os hobbies, deixando ao can nunha situación final de abandono. "Os animais duran moitos anos e precisan atención durante toda a súa vida" afirmou José Luis Pedreira resumindo a idea principal do vídeo. O vídeo tamén achega algunhas cifras que contextualizan este problema como son os 8.000 cans que se abandonan ao ano na Galiza, e os 8 cans ao día que se abandonan só na provincia de Pontevedra.

Eva Vilaverde informou que na realización do vídeo a Deputación se contou coa colaboración da protectora de Pontevedra ‘Adopción Galicia' e de persoas sensibilizadas que quixeron participar no vídeo. A realización profesional correu a cargo de Eriza Productora Audiovisual. Por último, Vilaverde indicou que a campaña se complementa coa liña de subvencións para entidades protectoras -liña publicada no BOPPO o 20 de xullo- e co esforzo de mellora do centro do CAAN coas obras de ampliación.