O GES DE A GUARDA RECIBÍU TRAXES DE PROTECCIÓN PARA A LOITA CONTRA A VESPA ASIÁTICA

O venres día 1 de Abril de 2016, membros do Grupo de Emerxencias Supramunicipal de A Guarda participaron nunhas Xornadas de formación sobre o control da vespa velutina na sede da Axencia Galega de Seguridade Pública AGASP.

Dentro da campaña de vixilancia e control da vespa velutina, a DXEI da AGASP organizou esta xornada de formación dedicada en exclusiva ós grupos de emerxencia supramunicipal, procedendo así mesmo a entrega de traxes de protección necesarios para a retirada segura dos seus niños.

Recordamos que o GES de A Guarda ten facilitado a retirada de numerosos niños de Vespa Velutina na Comarca do Baixo Miño, sendo arestora unha das tarefas das que se farán cargo, trala sinatura da renovación do conveni o cos GES entre a Xunta, FEGAMP e os Concellos.

Os conselleiros aproveitaron a presenza dos GES nunha ‘Xornada formativa sobre o control da vespa velutina' para facer entrega deste novo material que, como explicou Rueda, tenta conseguir que as persoas que traballan na xestión das emerxencias conten cos mellores medios e traballen nas mellores condicións.

O vicepresidente incidiu na importancia da formación e de contar con equipamentos axeitados, dous dos piares para que estes grupos de emerxencias poidan ofrecer un servizo óptimo á cidadanía. "Máis preparados e equipados os GES poderán ofrecer unha mellor resposta ante calquera incidencia, especialmente na loita contra este tipo de vespa".

Con este mesmo obxectivo, a principios desta semana entregáronse un centenar de traxes para a destrución e retirada de niños da velutina aos bombeiros galegos e está prevista unha partida similar na que se incluirá ás Asociacións de Voluntarios de Protección Civil dos concellos onde esta especie estea actuando ou se prevea un posible avance.

A importancia da coordinación entre administracións
Pola súa banda, a conselleira do Medio Rural, Ángeles Vázquez, remarcou a importancia da coordinación entre as diferentes administracións na loita contra a vespa velutina e o esforzo que está a realizar a Xunta para facer fronte a este problema.

Neste sentido, a conselleira destacou que Medio Rural retirou ou inactivou o pasado ano máis de 5.600 niños desta especie en 170 concellos. A estes habería que sumar os intervidos por outros axentes, como asociacións apícolas, concellos ou parques de bombeiros, co que o número chegaría a preto de 8.000 actuacións.

Ángeles Vázquez sinalou ademais que a Xunta entregou o pasado mes de febreiro 1.200 trampas comerciais e botes de líquido atraente aos apicultores con asentamentos localizados en concellos nos que se detectaron niños desta vespa. E estase a reforzar este reparto ao longo da primavera, período no que as raíñas desta especie saen da época de hibernación.