A DEPUTACIÓN DE PONTEVEDRA IMPULSA UN PROXECTO DE COOPERACIÓN PARA FAVORECER A COMPETITIVIDADE DA INDUSTRIA METALÚRXICA DA EURORREXIÓN

O proxecto CIME ten entre os seus obxectivos, tal e como subliñou Silva, "xerar un claro retorno e impulsar o crecemento económico, crear emprego, incrementar a competitividade empresarial, o I+D, as novas tecnoloxías e a formación, facendo partícipes ós concellos e traballando conxuntamente con Portugal para promover proxectos que beneficien ó conxunto da sociedade". A Presidenta da Deputación destacou a importancia da colaboración e da suma de sinerxias para impulsar proxectos que consigan que a sociedade avance.

Ademais, Carmela Silva subliñou o papel das administracións no impulso de actuacións como esta asegurando que "non podemos ser simplemente xestoras de recursos públicos senón que temos que promover a colaboración público-privada e converternos en administracións que estamos preto da realidade do noso entorno, abertas a colaborar nunha relación de igualdade e intelixencia para poder poñer en valor proxectos que ilusionen á sociedade e impulsen a innovación e o desenvolvemento".

Pola súa banda, os colaboradores do proxecto CIME divulgaron a importancia de promover a competitividade do sector metalúrxico na Eurorrexión, cunha importante contribución ó PIB (16% do PIB galego) e xeración de postos de traballo. Así, o Director Xeral de CATIM destacou a importancia de CIME para o sector debido, fundamentalmente, "á necesidade de impulsar a innovación e formación para poder competir nunha economía circular e dixital que aposta pola customización, polo análise, pola produción 4.0, por transformar produtos en servizos e por novos modelos de negocios".

O Vicepresidente de AIMMAP, que aglutina a máis de 1.000 empresas metalúrxicas portuguesas, subliñou que "a importancia de favorecer e mellorar a competitividade no sector metalúrxico que representa unha terceira parte das exportacións portuguesas".

Enrique Mallón, Secretario Xeral de ASIME, agradeceu o impulso que a Deputación de Pontevedra está a dar ó sector metalúrxico a través do proxecto CIME. Así, Mallón manifestou que a súa satisfacción pola "proactividade da institución provincial respecto á posibilidade de impulsar un proxecto de internacionalización, innovación e formación da industria metalúrxica".