O AECT Rio Miño cualifica de -escándalo- o -caos- sufrido hoxe polas persoas traballadoras na fronteira con Portugal

O Consello de Coordinación do AECT deu onte o visto bo á moción coa que os 16 concellos e cámaras da raia pedirán compensacións

“O acontecido hoxe na fronteira con Portugal foi un caos e un escándalo”. Así definiu o vicedirector do AECT Río Miño, Uxío Benítez, as máís de dúas horas de espera e as colas quilométricas –ata Guillarei- que tiveron que sufrir as persoas traballadoras para pasar o control do paso de Tui a Portugal na mañá de hoxe.

Benítez destacou que é inasumible que despois de meses coas fronteiras pechadas se volvan repertir problemas loxísticos nos puntos de control fronteirizo “igual que se estiveramos no primeiro día do confinamento, sen ter coñecemento e medios para os problemas de saturación”. “Isto sobrepasa o definible e ten que haber solucións e compensacións aseguradas”, subliñou.

O vicedirector do AECT insiste en que chove sobre mollado unha vez máis, e que a situación vivida hoxe vén “quentar máis o ambiente” tras o anuncio hai uns días de que a fronteira vai estar pechada outros 15 días máis.

Explicou, de feito, que foron centos de persoas afectadas as que se puxeron en contacto co Agrupamento e cos concellos fronteirizos para, unha vez máis, deixar constancia do seu enfado pola situación e o dano económico e social que está a causar o feche da fronteira no Miño, agora máis aínda cando se está a reabrir e a reactivar a economía en todas e cada unha das localidades tanto galegas como lusas.

Antes de coñecer a situación acontecida hoxe, na tarde de onte luns o Consello de Coordinación do AECT Río Miño aprobou o texto da moción que aprobarán en Pleno os 16 concellos e cámaras da raia sobre a situación da fronteira.

Nestas mocións os gobernos locais insisten na conclusión do estudo do impacto socioeconómico encargado polo AECT Rio Miño á  Universidade de Vigo, que é que o primeiro confinamento e o peche da fronteira entre Pontevedra e Portugal na primeira vaga da pandemia, entre o 17 de marzo e o 30 de xuño de 2020, provocou unha caída do Produto Interior Bruto de máis de oitenta millóns de euros nos 26 concellos do territorio transfronteirizo do Miño. Subliñan que a caída derivada do efecto fronteira no comercio foi dun 14,18% sobre o efecto do confinamento, e na hostalaría e restauración foi dun 16,53%.O prexuízo económico do actual peche será aínda moito maior.

Ante isto, as corporacións pedirán ás autoridades estatais, rexionais e autonómicas dos estados español e portugués medidas de compensación polo prexuízo económico, impulsando medidas dirixidas especificamente á recuperación socio económica da fronteira do rio Miño procedentes do Plan europeo de recuperación Pos-COVID (NEXT EU), así como do Marco Financeiro Europeo 2021-2027.

Tamén esixirán a integración inmediata dos traballadores transfronteirizos como beneficiarios dos mecanismos socioeconómicos aprobados polos gobernos de Portugal e España para afrontar o impacto da pandemia causada polo COVID-19 e que as empresas prexudicadas polos peches fronteirizos sexan igualmente elixibles nos seus propios mecanismos de recuperación.

Reclamarán, así mesmo, diante dos gobernos de Portugal e España, así como diante do Goberno galego a creación da tarxeta cidadá transfronteiriza que poida ser esencial para a convivencia social e para a economía destas rexións fronteirizas, e esixirán a posta en marcha dun Investimento Territorial Integrado de carácter Transfronteirizo (ITI) concertada entre ambos países e dotada financeiramente con cargo a fondos europeos.

Estes acordos nos concellos e cámaras serán trasladados aos presidentes dos gobernos portugués e español, presidente da Xunta de Galicia e da Comissao de Coordenaçao e Desenvolvimento Rexional do Norte, comisaria europea  de cohesión, presidenta da Comisión Europea, presidente do Comité das Rexións,  Grupos parlamentarios europeos, do Congreso e Senado español e da Assembleia da República Portuguesa.